Հունիսի 21-ին Բերձորի Վ. Թեքեյանի անվ. թիվ 1 միջն. դպրոցի դահլիճում կայացավ «Բռեյն-ռինգ» ինտելեկտուալ խաղ-մրցույթի Բերձորի առաջնությունը, որը կազմակերպել էր շրջվարչակազմի աշխատակազմի մշակույթի և երիտասարդության հարցերի բաժինը: Մրցույթին մասնակցեցին Բերձորում գործող հիմնարկների ներկայացրած «Շրջանային բուժմիավորում», Բերձորի «Վ. Զատիկյանի անվ. թիվ 2 միջն. դպրոց», «Արդարադատություն», «Ֆինանսիստներ», «Մերան երկշաբաթաթերթ» և «Քաշաթաղի շրջանի վերաբնակեցման վարչություն» թվով 6 թիմ:
Ամառային արձակուրդների պատճառով խաղին չմասնակցեցին աշակերտական թիմերը:
Մրցույթի համակարգող և խաղավար, ՄԵ բաժնի գլխավոր մասնագետ Հասմիկ Կարապետյանը ողջունեց մասնակիցներին, ներկայացրեց խաղի կանոնակարգը: Մրցույթը կայացավ 3 փուլով, յուրաքանչյուրում 10 հարց՝ 1-ական միավորով:
Վերջնական արդյունքում 12 միավորով հաղթող ճանաչվեց Բերձորի թիվ 2 դպրոցի թիմը, երկրորդը շրջվարչակազմի աշխատակազմի ֆինանսատնտեսական բաժնի թիմն էր: Չնայած որոշ անհամաձայնություններին, այնուամենայնիվ, հանձնախումբը որոշեց, որ երրորդ հորիզոնականում է շրջանային բուժմիավորումը:
Խաղի կայացմանը աջակցել էին Բերձորում գործող 2 անհատ ձեռներեցներ՝ «Նորիկ Ահրամանյան», «Լարիսա Հայրապետյան» և «ԱԳԱՊԵ» կրոնա-բարեգործական կազմակերպությունը:
Խաղին մասնակից, «Հայապատում» երիտասարդական ՀԿ նախագահ Արմեն Մխիթարյանը «Արցախապատում« գրքի երկու հատորները նվիրեց համակարգչային սարքավորումներն սպասարկող Հրայր Կարապետյանին:
Մրցույթի եզրափակիչ փուլը կկայանա այս տարվա աշնանը: Կմրցեն 1-3-րդ տեղեր գրաված թիմերը:
Զոհրաբ Ըռքոյան
