Արդեն հինգ ժամ է, ինչ Բաղրամյան պողոտայում շարունակվում է «Ոչ թալանին» քաղաքացիական նախաձեռնության կազմակերպած ակցիան` էլեկտրաէներգիայի թանկացման դեմ: Ակտիվիստներից Մաքսիմ Սարգսյանն առաջարկեց ցուցարարներին վերադառնալ Ազատության հրապարակ, քանի որ քիչ անց «լույսերը կանջատեն ու ամեն բան անկառավարելի կդառնա»:
Ներկաները չեն համաձայնում ու վանկարկում են՝ «տե-ղում, տե-ղում»:
Տարակարծությունը տեւական ժամանակ շարունակվում էր: Մի մասը ցանկանում են վերադառնալ Ազատության հրապարակ, մյուսները կարծում են, որ Բաղրամյան պողոտայից չպետք է հեռանան, քանի դեռ չի կատարվել իրենց պահանջը:
Կարդացեք նաև
«Մեզ քննարկում ա պետք, ծրագիր ա պետք, ծեծու ջարդ պետք չի»,- կարծում են առաջինները, մյուսները հակադարձում են. «Որ գալիս էիք` գիտեիք ինչի եք գնում»:
Վաղինակ Շուշանյանը եւս հանդես եկավ հօգուտ Բաղրամյան պողոտայում մնալու:
Վեճին միջամտեց Վալերի Օսիպյանը` զգուշացնելով, որ ցուցարարների մեջ կան մարդիկ, ովքեր տանում են սադրանքների ու բախումների. «Այն քաղաքացիները, որ պնդում են պիտի մնալ` տանում են անօրինական ճանապարհի»: Օսիպյանի խոսքն ընդհատեցին ցուցարարների սուլոցները:
Ի վերջո, ցուցարարները մնացին Բաղրամյան պողոտայում:
Նելլի ԳՐԻԳՈՐՅԱՆ
