«Սա մոդուլի փոփոխություն է, սա մոդելի փոփոխություն է»,- օգոստոսի 24-ին «Հենարան» մամուլի ակումբում լրագրողների հետ հանդիպման ընթացքում, անդրադառնալով սահմանադրական փոփոխություններին, ասաց ՀՀԿ խմբակցության պատգամավոր Կարինե Աճեմյանը:
Ըստ նրա՝ այդ փոփոխությանը սպասում էր ամբողջ հայ հասարակությունը. «Ես կողմ չեմ այն ընդդիմախոսներին, որոնք ասում են, թե հասարակությունում սահմանադրական բարեփոխումների պահանջ չկա, որովհետեւ մենք տարիներ շարունակ ե՛ւ կուսակցությունների կողմից, ե՛ւ հասարակության անդամների լսում ենք այդ խոսքերը՝ մեզ պետք են լուրջ փոփոխություններ, եւ պետք են ոչ թե անձերի, պաշտոնյաների փոփոխություններ, այլ համակարգային փոփոխություն: Իսկ համակարգային փոփոխությունը միայն կարող է իրականացվել կառավարական համակարգի փոփոխությամբ»:
Կարինե Աճեմյանը նշեց, որ իրականում այս փոփոխություններին սպասում էինք. «Այս փոփոխությամբ կարող է դաշտը առողջանալ, քաղաքական կուսակցություններն՝ իրենց առողջացման ծրագրերն իրականացնել, որովհետեւ այսօր ինչքան էլ մեզ փնովեն, քննադատեն, ասեն, որ Հանրապետականը ճիշտ չէ իրականացնում քաղաքական կուրսը, ես կարծում եմ, որ ավելի կայացած կուսակցություն չկա, որովհետեւ կուսակցությունը ողնաշար ունի, կառույցներ ունի, շատ կարեւոր հանգամանք ունի, նաեւ գաղափարախոսություն եւ վստահ ղեկավարող առաջնորդ: Որեւէ այլ կուսակցություն, ցավոք սրտի, չի կարող այդ պատասխանատվությունն իր վրա վերցնել»:
Կարդացեք նաև
Ամի ՉԻՉԱԿՅԱՆ
