«Կառավարության որոշումը որեւէ քննադատության չի դիմանում: Ինչո՞ւ պետք է Կարեն Դեմիրճյանի անվան այդ բացառիկ համալիրը վաճառվի ինչ-որ ընկերության, որը գրանցվել է ընդամենը մեկ ամիս առաջ: Անընդունելի եմ համարում նաեւ հարակից տարածքների կառուցապատումը, որոնք աղավաղելու են ճարտարապետական տեսքը, կանաչ տարածքների ոչնչացման հաշվին է լինելու: Կառավարությունը պետք է վերանայի իր մոտեցումները»,- այսօր լրագրողների հետ զրույցում Մարզահամերգային համալիրի վաճառքի հետ կապված այսպիսի գնահատական տվեց Կարեն Դեմիրճյանի որդին՝ ՀԺԿ նախագահ Ստեփան Դեմիրճյանը:
Նա ասաց, որ կառավարության այդ որոշմանը դեմ է ոչ միայն իրենց ընտանիքը, այլեւ բազմաթիվ բնապահպաններ, ճարտարապետներ. «Չի ընդունվում այդ որոշումը: Կազինոն միանշանակ անընդունելի է: Հիմա ասում են, թե կազինոն լինելու է 1.5-2 կմ հեռավորության վրա: Նախ, ինձ մոտ հարց է առաջանում, էդ ինչքա՞ն տարածք են հատկացրել այդ ընկերությանը: Մի ամբողջ վարչական տարա՞ծք են հատկացրել, որ 2 կմ այն կողմ էլ պետք է կազինոն կառուցվի»:
Ստեփան Դեմիրճյանն ասաց, որ ոչ միայն Համալիրի տարածքում, այլ առհասարակ նույնիսկ 100 մլն ներդրման դեպքում ինքը դեմ է, որ քաղաքում կազինո կառուցվի:
Հարցին՝ Դեմիրճյանների ընտանիքը նամակով դիմե՞լ է կառավարությանը, ինչպե՞ս եք պայքարելու որոշման դեմ՝ նա պատասխանեց, որ հետեւելու են գործընթացին. «Հուսով եմ, ի վերջո կառավարությունը ճիշտ կկողմնորոշվի»:
Կարդացեք նաև
Ստեփան Դեմիրճյանն ասաց, որ իրենք կգերադասեին, որ համալիրը մնար պետության դեպքում, բայց եթե վաճառում էլ են, այսպես չի կարելի վաճառել. «Ամենակարեւորը՝ ուղղվածությունը պահպանվի եւ չաղավաղվի ճարտարապետական տեսքը: Կասկած չկա, որ կազինոյի կետը սեփականատերերը կիրականացնեն: Այդ մտահոգությունը կա, որ սեփականաշնորհեն, բայց պատշաճ ուշադրություն չդարձնեն համալիրին»:
Հռիփսիմե ՋԵԲԵՋՅԱՆ
