Սեպտեմբերի 21-ին՝ Անկախության տոնին Եռաբլուր էր եկել ՀՀ պաշտպանության նախարար Սեյրան Օհանյանը:
Նախարարին մոտեցան բազմաթիվ քաղաքացիներ, զոհված զինծառայողների ծնողներ եւ իրենց խնդիրները բարձրաձայնեցին:
Մի տարեց մարդ, որի տղան պատերազմի հաշմանդամ էր, նախարարից տուն ուզեց: Նա բողոքեց, որ 10 տարի է՝ հաշվառված է, իրեն բնակարան դեռ չի հասել:
Կարդացեք նաև
Նախարարը պատասխանեց. «Հենց ընենց չի, որ բնակարանները էնտեղ շարած են, պիտի ձեզ բաժանեն: Որտեղի՞ց այդ բնակարանները»:
Տարեց մարդը հարցրեց. «Ի՞նչ անեմ, էթամ երկրորդ կարգի հաշմանդամ տղուս տամ դատարան, տո՞ւն պահանջեմ»:
Նախարարը պատասխանեց. «Քո փաստաթղթերը պետք է օրինականացնես»: Մարդը վստահեցրեց՝ բոլորն օրինական են»:
Հետո մի ՀԿ-ից կին մոտեցավ ու հարցրեց, թե մեր 100 հազարները ինչի՞ էլ չեն տալիս: Կինը նախարարին չկարողացավ բացատրել, թե ի՞նչ 100 հազարի մասին է խոսքը, ինչո՞ւ պիտի տային: Հետո աշխատակիցներն ասացին, որ օրենսդրությունում փոփոխություն է կատարվել, չափորոշիչներ են փոխվել: Նախարարն էլ պատասխանեց՝ օրենքն է այդպիսին:
Սեյրան Օհանյանը դժգոհեց, որ լրագրողներն իր ամեն քայլը նկարում են. «Տակ ի տակ հազիվ ենք քայլում, մարդկանց հոգու վրա մի նստեք, էլի»:
Նրա թիկնապահը սկսեց կանգնել մեր տեսախցիկի առջեւ եւ իր մեջքով փակեց օբյեկտիվը:
Հռիփսիմե ՋԵԲԵՋՅԱՆ
