Իրական աջակցություն «խորհրդանշական գյուղին»

 Վեց հասարակական կազմակերպություններ` Ամերիկայի հայ ավետարանչական ընկերակցությունը, «Զարգացման սկզբունքներ» ՀԿ-ը, «Հայաստանի մանուկներ» հիմնադրամը, Հայ օգնության ֆոնդը, Շեն և Վորլդ Վիժն բարեգործական կազմակերպությունների ներկայացուցիչներն այցելեցին Մարտունի գյուղ՝ Հայոց ցեղասպանության 100-րդ տարելիցի շրջանակներում «Մեկ խորհրդանշական գյուղ» համատեղ ծրագրի հերթական միջոցառումներով:

6 կազմակերպությունների աննախադեպ այս համագործակցությամբ ընտրված խորհրդանշական գյուղը՝ Գեղարքունիքի մարզի Մարտունին, հիմնվել է 1921թ.-ին՝ հիմնականում Վանից, Ալաշկերտից, Ղարսից և Սասունից բռնագաղթածների կողմից: Ծրագիրը եռամյա է՝ օգնելու տեղաբնակներին սեփական և տրամադրված ռեսուրսներով ոտքի կանգնեցնել գյուղը։ Ծրագրի շրջանակներում Մարտունիում հիմնվել է արոտօգտագործողների սպառողական կոոպերատիվ, որն այսօրվա այցելության ընթացքում 2 տրակտոր և 10 խոտհնձիչ է ստացել: Նաև վերակառուցել է խմելու ջրագիծը, ինչի շնորհիվ գյուղի բոլոր ընտանիքները մեկ ամսից մշտական ջուր կունենան: Ծրագրի սոցիալական ոլորտի ևս մեկ մոտեցում աջակցությունն է գյուղի ընտանիքներին՝ զարգացնելու փոքր ընտանեկան ֆերմերային տնտեսությունները, որի շրջանակներում կարիքների գնահատման հիման վրա ընտրված 10 ընտանիքների կովեր կտրամադրվեն: Առողջապահական ոլորտում ծրագրի միջոցով անցկացվել է հիվանդների զննում, հետազոտվել և խորհրդատվություն է ստացել 30 հիվանդ: Դպրոցահասակ 38 երեխա ատամնափուտի տարածվածության բացահայտման հետազոտում է անցել ու ատամնաբուժական անվճար ծառայություն ստացել շարժական ատամնաբուժարանի միջոցով: Ծրագրի իրականացմանը զուգընթաց արդեն իսկ բարելավված շենքային պայմաններ ունի Մարտունիի բուժկետը, որ նախատեսվում է ամբողջությամբ ավարտել ծրագրի ընթացքում: Երիտասարդները ևս համախմբվելու և համայնքի համար օգտակար գործունեության ծավալելու հնարավորություն են ստացել: ՍՔԱՅ ակումբի անդամ երիտասարդները մշակել և մինչև հոկեմբերի 15-ը կիրականացնեն իրենց առաջին համայնքային ծառայության ծրագիրը, որի նպատակն է հիմնել կինոսրահ՝ օրվա առաջին կեսին ֆիլմեր ցուցադրելու դպրոցահասակների, իսկ երեկոյան ժամերին՝ երիտասարդների համար: Գյուղի ուսանողների ուսման վարձերի մի մասը ևս հոգածության առարկա է այս ծրագրի շրջանակներում: Մեծ ուշադրություն է հատկացված նաև երեխաների կրթությանը, ուստի արդեն իսկ 2 տարի ժամկետով գյուղ մասնագետ է ուղարկվել՝ գիտելիքներից զատ դպրոցականներին նաև կյանքի հմտություններ փոխանցելու և կարողությունները զարգացնելու նպատակով: Արտադասարանային կրթություն է տրամադրվում առողջ ապրելակերպի վերաբերյալ: