«Իրազեկ քաղաքացիներ միավորում» հ/կ համակարգող Դանիել Իոաննիսյանն այսօր հարցում է ուղարկել էներգետիկայի ու բնական պաշարների նախարար Երվանդ Զախարյանին՝ պարզելու «Տաշիր գրուպի» եւ օֆշորային «Լիորմանդ Հոլդինգզ Լիմիթեդ» ընկերությունների կապը:
Հիշեցնենք, որ հանրային ծառայությունները կարգավորող հանձնաժողովն այսօր որոշում է կայացրել ՀԷՑ-ը «Լիորմանդ Հոլդինգզ Լիմիթեդ» ընկերությանը վաճառելու մասին, հաստատվել է «Ինտեր Ռաօ» ընկերության ու «Տաշիր գրուպի» միջեւ տեղի ունեցած գործարքը:
«Նախարարը պետք է բացատրի՝ եթե ՀԷՑ-ի գնորդը այդ օֆշորային կազմակերպությունն է, այդ կազմակերպության հետ ինչ կապ ունի «Տաշիր գրուպը», խուճուճ-մուճուճ գործարք է, որից ոչ ոք ոչինչ չի հասկանում, թե ով ում ընկերն է: Սա, իհարկե, ահռելի գումարներ աշխատելու հերթական մեխանիզմն է, այդ ամեն ինչն էլ փորձում են սիրուն ներկայացնել, թե տեսեք՝ Սամվել Կարապետյանն ինչքան բարի է, որ իր անձնական հաշվին զոհաբերություն է անում, ժողովրդին էլեկտրաէներգիա է սուբսիդավորում»,- ասում է Դանիել Իոաննիսյանը:
Հիշեցնենք, որ «Տաշիր գրուպը» հայտարարել էր, որ հաջորդ տարվա ընթացքում սեփական միջոցների հաշվին՝ ՀՀ կառավարության հետ պարիտետային սկզբունքով, բարձրացած եւ մինչեւ 2015թ. օգոստոսի 1-ը գործող սակագնի տարբերությունը՝ բնակչության եւ փոքր բիզնեսի համար կփոխհատուցի:
Կարդացեք նաև
Արփինե ՍԻՄՈՆՅԱՆ
