Քաղաքագետ Էդուարդ Անտինյանի մեկնաբանմամբ, Ադրբեջանին վերջին շրջանում չի հաջողվում ստանալ միջազգային հանրության բարեհաճությունը ԼՂՀ հակամարտության հարցում:
«Ադրբեջանը, երբ ցանկանում էր առիթն օգտագործել ու աշխարհի ուժի կենտրոնների բարեհաճության շնորհիվ լուծել Ղարաբաղի հարցը, հակառակ էֆեկտը ստացավ: Եթե ժամանակին ՀՀ իշխանություններն ասում էին, որ չեն ճանաչում ԼՂՀ անկախությունը, որ բանակցային գործընթացը անիմաստ չդառնա, իսկ բանակցային գործընթացի դադարեցման այլընտրանքը պատերազմն է, այս պարագայում, երբ նախագահը հայտարարում է ՝ ԼՂՀ-ն Հայաստանն է, չեմ համարում, որ դա էմոցիոնալ հայտարարություն է: Որովհետեւ, եթե սահմանին արդեն հրթիռակոծում են, չի կարող գերագույն գլխավոր հրամանատարը էմոցիոնալ հայտարարություն անել, դա բավականին կշռադատված, հիմնավորված հայտարարություն է, որն իր հետեւանքն է ենթադրում»,- ասաց քաղաքագետը:
Պարոն Անտինյանի խոսքով, Ղարաբաղը Հայաստանի անբաժան մասն է ասելով՝ հայկական կողմը չի բացառում բանակցային գործընթացում ԵԱՀԿ Մինսկի խմբի ձեւաչափի դադարեցումը. «Որովհետեւ էլ ինչն ենք քննարկում, դա նշանակում է, որ պատրաստ ենք բանակցային գործընթացի դադարեցման այլընտրանքին՝ պատերազմին: Հայաստանը միշտ էլ ասում է՝ բավարար ուժ ունի հաղթելու համար, նույնիսկ կարիք չունի ՀԱՊԿ-ի աջակցության, այս դեպքում մեկ այլ խնդիր է առաջանալու: Եթե ժամանակին մտածում էինք, որ մինչեւ չլինի միջազգայնորեն ճանաչված հաշտության վերջնական փաստաթուղթ, որի դեպքում նոր միայն տարածաշրջան կարող են մտնել խաղաղապահ զորքեր, որ կարողանան այդ փաստաթղթի կենսագործունեությունն ապահովել, ապա տվյալ դեպքում այլեւս չպետք է սպասել, որ հաշտության պայմանագիր կնքես, որ խաղաղապահ զորքեր հայտնվեն… հայկական կողմն ասաց՝ Ադրբեջանի նետած ձեռնոցը վերցնում ենք, կրկնում եմ չի բացառվում բանակցային գործընթացի դադարեցումն ու պատերազմի վերսկսումը»:
Արփինե ՍԻՄՈՆՅԱՆ
