ԱՆ ՔԿՎ այլընտրանքային պատիժների կատարման բաժնի (ԱՊԿԲ) պետ Լեւոն Ավետիսյանի տվյալներով, իրենց ծառայությունում հաշվառված է 223 ազատազրկման դատապարտված, նրանցից 1229-ը պատիժ են կրում, մնացածը վերահսկողության տակ են գտնվում:
Նրա խոսքով, Սահմանադրական դատարանի՝ անցած տարվա որոշումը՝ քրեական օրենսգրքի 54 հոդվածի առաջին մասը հակասահմանադրական ճանաչելու մասին, մի շարք հակասություններ է առաջացրել ազատազրկման դատապարտվածի՝ տուգանքի վճարել-չվճարելու հարցում:
Նա ներկայացրեց 2012-2015 թվականների տուգանքների գանձման վիճակագրությունը եւ օրինակներով փաստեց. «2012-ին գանձել ենք 144 միլիոն 695.000 դրամ, 2013-ին՝ 138 միլիոն, 2014-ին՝ հակասահմանադրական ճանաչվելուց հետո 59 միլիոն, իսկ այս տարվա իննը ամիսների տվյալներով 66 միլիոն: էապես երեւում է, որ կիսով չափ կրճատվել է գանձումը, ու դա պայմանավորված է նրանով, որ բոլորը դատապարտվածները գիտեն, որ տուգանք պատժատեսակը չվճարելու դեպքում դատապարտված անձի պատժին խստացում չի սպասվում»:
Պարոն Ավետիսյանը այլ խնդիրներ էլ է արձանագրել. «Խնդիր է առաջանում նաեւ այն դեպքում, երբ հանրային աշխատանքից ազատվում են հաշմանդամություն կամ թոշակի տարիքի անձինք: Անհասկանալի է, հակասություն է առաջանում, երբ որ ազատազրկումը փոխարինվում է հանրային աշխատանքով՝ որպես մեղմ պատժատեսակի, փաստորեն, թոշակառուները, հաշմանդամ մարդիկ ավտոմատ չեն կարող օգտվել այդ ինստիտուտից»:
Կարդացեք նաև
Նա նաեւ նկատեց, որ օրենքով թույլատրվում է տուգանքը հետաձգել, որ դատապարտյալը կարողանա մաս առ մաս վճարել, բայց. «Մեզ չի թույլատրվում դատարան միջնորդություն ներկայացնել դատապարտվածին այդ լիազորությունը տալու պահանջով»:
Պարոն Ավետիսյանը մեկ այլ խնդիր էլ նշեց, օրինակ` իրենց ծառայության մարզային բաժիններում հանրային աշխատանք կատարող դատապարտյալներին դժվար է հսկել՝ իրենք այդ հանրային աշխատանքը կատարում են, թե՝ ոչ. « Բացի դա գյուղերում բոլորը մեկը մյուսի բարեկամ ու ծանոթ են, դա էլ է շրջանցելու պատճառներից մեկը»:
Արփինե ՍԻՄՈՆՅԱՆ
