«Հաշմանդամություն ունեցող անձանց ազգային դաշինքի» նախագահ Զարուհի Բաթոյանը մտահոգված է՝ առաջիկա ընտրություններին հաշմանդամ մարդիկ խնդիրներ կունենան մասնակցելու: Այսօր «Անալիտիկ» ակումբում նա ասաց, որ մասնակցության համար ապահովված չեն անհրաժեշտ հարմարությունները:
«Նկատի չունենք միայն տեղաշարժվելու խնդիր ունեցող անձանց, կան լսողության, տեսողության կամ մտավոր հաշմանդամություն ունեցող անձիք, ովքեր ունեն նաեւ տեղեկատվության պակաս: Մենք այս հարցով դիմել ենք Կենտրոնական ընտրական հանձնաժողովին բոլոր հարմարավետ պայմանների ստեղծման համար»,- ասաց Զարուհի Բաթոյանը:
Նա հիշեցրեց, որ հինգ տարի առաջ վավերացվեց Հաշմանդամություն ունեցող անձանց իրավունքների մասին կոնվենցիան.« Կոնվենցիայի նպատակն է աջակցել պաշտպանել եւ ապահովել հաշմանդամություն ունեցող անձանց ՝ լիարժեքորեն եւ հավասարապես օգտվել մարդու իրավունքներից եւ հիմնարար ազատություններից, ինչպես նաեւ ապահովել հարգանքը նրանց արժանապատվության նկատմամբ»:
Արփինե ՍԻՄՈՆՅԱՆ
