«Քարարտ»-ը եւ « Իջեւանի բենտոնիտը»-ը պարտքը մարեցին
Իջեւանի տարածաշրջանում գործող արտադրական 2 մեծ ձեռնարկություններից պարտապանները դատարանով են իրենց հասանելիք գումարները գանձել:
«Հայաստանի կենտրոնական դեպոզիտարիա» ԲԲԸ-ն հայց է ներկայացրել Գետահովիտ գյուղի տարածքում գործող «Քարարտ» ՓԲԸ-ի դեմ: Հայցը վերաբերում էր «Քարարտից» գումար բռնագանձելուն: Տավուշի մարզի առաջին ատյանի դատարանն այս գործով նախնական նիստերից հետո անցել է դատաքննության: Կենտրոնական դեպոզիտարիան 2015թ. սեպտեմբերի 28-ին դատարան ներկայացված դիմումով հայտնել է, որ «Քարարտը» դատարան ներկայացված հայցադիմումի մեջ նշված գումարը վճարել է եւ հրաժարվել է հայցից: Նոյեմբերի 10-ին Տավուշի մարզի առաջին ատյանի դատարանի դատավոր Լիլիթ Սարգսյանը որոշել է քաղաքացիական գործի վարույթը կարճել:
Տավուշի մարզի Ակնաղբյուր գյուղում գործող «ՄԱՆ-ԳԱԳ» ՍՊԸ-ն 2015թ. օգոստոսի 10-ին հայց է ներկայացրել Ազատամուտ գյուղում գործող «Իջեւանի բենտոնիտ կոմբինատ» ԲԲԸ-ի դեմ: Այդ հայցով «ՄԱՆ-ԳԱԳ» ՍՊԸ-ն դատարանին խնդրել է պարտավորեցնել բենտոնիտի կոմբինատին վճարելու իրենց միջեւ կնքված պայմանագրի գինը՝ 15 միլիոն 160 հազար դրամ, գումարի վճարումն ուշացնելու համար՝ տոկոսներ: 2014թ. սեպտեմբերի 17-ին բենտոնիտի կոմբինատը եւ «ՄԱՆ-ԳԱԳ» ՍՊԸ-ն պայմանագիր են կնքել, որով «ՄԱՆ-ԳԱԳ» ՍՊԸ-ն ստանձնել է Տավուշի մարզի Սարիգյուղի բենտոնիտային կավերի հանքավայրի 8 հեկտար տարածքում հանուկի ելքով 360 գծամետր ծավալով մեխանիկական հորատային աշխատանքներ կատարել: Պայմանագրի կնքումից հետո Իջեւանի բենտոնիտ կոմբինատը պայմանագրով նախատեսված 20 տոկոս կանխավճարը վճարել է ոչ թե պայմանագրի կնքմանը հաջորդած 10 բանկային օրվա ընթացքում, այլ՝ ամիսներ հետո: «ՄԱՆ-ԳԱԳ» ՍՊԸ-ն պայմանագրով նախատեսված աշխատանքները կատարել է պայմանագրին համապատասխան, որի վերաբերյալ կազմվել են հանձնման-ընդունման ակտեր: Չնայած պայմանագրով ծագած պարտավորությանը եւ «ՄԱՆ-ԳԱԳ» ՍՊԸ-ի բազմաթիվ պահանջներին՝ «Իջեւանի բենտոնիտ կոմբինատ» ԲԲԸ-ն չի վճարել աշխատանքների արժեքի մնացած մասը՝ 15 միլիոն 160 հազար դրամը:
Կարդացեք նաև
2015թ. օգոստոսի 25-ին Իջեւան քաղաքում կայացել է հաշտության համաձայնություն, բենտոնիտի կոմբինատը 15 միլիոն 160 հազար դրամը փոխանցել է «ՄԱՆ-ԳԱԳ» ՍՊԸ-ի եւ պարտավորվել այդ ընկերության փաստաբանի վարձատրության 150 հազար դրամը փոխանցել 15 օրվա ընթացքում: 2015թ. հոկտեմբերի 7-ին Տավուշի մարզի առաջին ատյանի դատարանի դատավոր Աշոտ Խաչիկյանը վճռել է քաղաքացիական գործի վարույթը կարճել: Այս վճիռը մտել է օրինական ուժի մեջ:
Ոսկան ՍԱՐԳՍՅԱՆ
