2015 թվականի ձմեռային զորակոչի ընթացքում քաղաքացիների դիմումների եւ բողոքների քննարկման հանձնաժողովը դեկտեմբերի 16-ին գումարեց իր առաջին նիստը: Նիստի ընթացքում հանձնաժողովի անդամները լսեցին մի շարք զորակոչիկների բողոքները եւ համապատասխան որոշումներ կայացրեցին:
Հանձնաժողովի նախագահ Գեղամ Հարությունյանը լրագրողների հետ զրույցի ընթացքում ասաց, որ անցած զորակոչի ընթացքում հանձնաժողովը քննարկել է բոլոր դիմում-բողոքները, եւ որտեղ միջնորդության անհրաժեշտություն է եղել, հանձնաժողովը համապատասխան միջնորդագրեր է ուղարկել զորակոչային մարմիններին. «Յուրաքանչյուր դեպքում դիմողն ինքն է որոշում իրեն հուզող հարցերը հղել: Եթե դիմումը եկել է` լինի հիմնավորված կամ չհիմնավորված, մենք պարտավոր ենք քննարկել: Իհարկե՛, երբ միջամտության համար հիմքեր չեն լինում, մենք պարզաբանում ենք, որ ընդունված որոշումները հիմնավորված են կամ զորակոչի գործընթացը բնականոն ընթանում է, համապատասխան ընթացք չենք տալիս»:
Գեղամ Հարությունյանը նշեց, որ այս անգամ եւս զորակոչիկները եւ նրանց հարազատները նույն խնդիրներով են դիմել հանձնաժողովին, ինչ անցած տարիներին` առողջական, ընտանեկան հանգամանքներից բխող եւ իրավական խնդիրներ: Նա ընդգծեց, որ ընտանեկան հանգամանքների հետ կապված երկու հիմնական հարց է արծարծվում` բնակավայրին մոտ ծառայելու արտոնությունից օգտվելու եւ արդեն իսկ ծառայող եղբոր մոտ ծառայության ուղարկելու խնդրանք:
«Այս պահին ստացել ենք 45 դիմում-բողոք: Դարձյալ նույն օրինաչափությամբ՝ որպես կանոն, հիմնականում սրտի հետ կապված խնդիրներ են արծարծվում, նաեւ՝ հենաշարժական համակարգի հետ կապված»,- ասաց նա:
Կարդացեք նաև
Հարցին, թե միջնորդությունները որքա՞ն հաճախ են բավարարվում, Գեղամ Հարությունյանը պատասխանեց. «Որպես կանոն 1/3-ի չափով միջնորդությունները բավարարվում են, դա պայմանական թիվ է: Որոշումների վերանայումը չէ միայն դիմում-բողոքների բավարարման ցուցանիշը, որովհետեւ ոչ բոլոր դեպքերում ենք մենք այդպիսի խնդիր դնում` վերանայել արդեն ընդունված որոշումը: Լինում են դեպքեր, երբ անհրաժեշտ է լրացուցիչ անդրադառնալ խնդրին, ինչ-որ տեսանկյունից քննարկել հարցը կամ լրացուցիչ ու ստուգիչ հետազոտություն կատարել»:
Ամի ՉԻՉԱԿՅԱՆ
