«Սահմանադրական փոփոխությունների հանրաքվեն Հայաստանի ներքին կյանքի լրջագույն իրադարձություններից մեկն է, որը ձեւավորում է քաղաքական փոխհարաբերությունների նոր հիմքերը»,- այսօր «Հենարան» մամուլի ակումբում, ամփոփելով անցնող քաղաքական տարին, ասաց քաղաքագետ Ալեքսանդր Մարգարովը:
Հաջորդ կարեւոր ներքաղաքական իրադարձությունը քաղաքագետը համարում է տարեսկզբին`փետրվար ամսին ձեւավորված ԲՀԿ-ՀՀԿ նոր փոխհարաբերությունները, որոնց արդյունքում լուրջ քաղաքական վերադասավորումներ եղան քաղաքական դաշտում: Սա, առաջիկա ընտրական փուլի համար, բանախոսը կարեւոր հիմք է համարում. «ԲՀԿ-ն պիտի վերագտնի իրեն`նոր ընտրություններով»:
Երրորդ` կարեւոր ներքաղաքական իրադարձությունը, թեժ ամառն էր`«Էլեկտրիկ Երեւանի» ժամանակ ծավալված դեպքերը, որպես քաղաքացիական դաշտի կայացման հիմք: Եվ նկատի ունենալով այն, որ ԱԺ պատգամավոր Էդմոն Մարուքյանի կողմից ստեղծված քաղաքական ուժում ներառվեցին «Դեմ եմ» շարժման երիտասարդներից, ստացվում է, որ դա նաեւ քաղաքական կայացման հիմք է:
2016-ին ներքաղաքական կյանքի գլխավոր իրադարձությունը լինելու է առաջիկա ընտրական փուլին նախապատրաստությունը:
Կարդացեք նաև
Ներքին եւ արտաքին քաղաքականությունը, Ալեքսանդր Մարգարովի փոխանցմամբ, կապում է Ցեղասպանության հարյուրամյակը եւ դրա շուրջ ծավալված իրադարձությունները`Հռոմի Պապի ելույթ, գերտերությունների ղեկավարների այցը Հայաստան, ՄԱԿ-ի կողմից ընդունված Հայաստանի առաջարկը` կապված ցեղասպանությունների կանխարգելման հետ եւ այլն. այդ ամենն աննկատ չեն կարող մնալ:
Արտաքին քաղաքական կարեւորագույն իրադարձություններից քաղաքագետն ընդգծում է եւ ԵԱՏՄ-ին Հայաստանի անդամակցությունը եւ ԵՄ-ի հետ բանակցությունների վերսկսումը:
Մանրամասները` տեսանյութում
Անցնող տարին, բնականաբար, բուռն էր նաեւ ԼՂ հարցի շուրջ ծավալված իրադարձություններով, մասնավորաբար, սահմաններում լարվածության պահպանմամբ եւ ժամանակ առ ժամանակ առավելագույնս սրմամբ: Ինչ ցույց տվեց անցնող տարին: Ըստ քաղաքագետի. «Կողմերի դիրքորոշումների բացարձակ տարբերությունը, ադրբեջանական քաղաքականության ոչ ադեկվատությունը եւ ադրբեջանական գործիչների պատրաստ չլինելը`բանակցային ուղով գնալու: Ադրբեջանական հռետորիկան եւ գործողությունները էապես տարբերվում են: Դա հասցրել է նրան, որ Մինսկի խումբը սկսեց շատ կոնկրետ եւ հասցեագրված արձանագրել Ադրբեջանի բացասական դերը բանակցային գործընթացում»:
Քաղաքագետը հետագա քննարկման հարց է համարում`հայկական կողմը շարունակի՞ պատասխան տալ ադրբեջանական ագրեսիային, թե՞ նախահարձակ լինելու ուղղությունը որդեգրի, կբերի՞ դա այն արդյունքին, որին ձգտում է Հայաստանը`խաղաղության պահպանում:
Իբրեւ անցնող տարվա տխուր իրադարձություն, Ալեքսանդր Մարգարովը առանձնացնում է Ավետիսյանների ընտանիքի սպանությունը, աննախադեպ դեպքեր համարում է «Նախախորհրդարանի» եւ Ժիրայի Սեֆիլյանի արշավը դեպի Արցախ, ահաբեկչական խմբի բացահայտումը:
Քաղաքագետը կարծում է՝ 2016-ին Հայաստանի համար արտաքին քաղաքականության մասով շարունակելու է առանցքային մնալ ԼՂ հարցում եւ ընդհանրապես տարածաշրջանային թնջուկներում սեփական անվտանգությունն ապահովելը:
Նելլի ԳՐԻԳՈՐՅԱՆ
