Այսօր ՀՀ քաղաքաշինության նախարարության Ճարտարապետության ազգային թանգարան-ինստիտուտում ամփոփվել է «Տարվա նախագիծ և կառույց-2015» խորագիրը կրող ամենամյա մրցույթ-ցուցահանդեսը, որի նպատակը մրցույթին նախորդող տարվա ընթացքում Հայաստանի Հանրապետության տարածքում իրականացված լավագույն կառույցների կամ նախագծային առաջարկների բացահայտումն է, բնագավառի զարգացումն ապահովող նորարարական մոտեցումների և գաղափարների ներառմամբ ներկայացումը։
Մրցույթ-ցուցահանդեսին, որն անցկացվել էր 2015 թվականի դեկտեմբերի 5-ից 15-ը` ճարտարապետության ազգային թանգարան-ինստիտուտում, մասնակցության հայտ էին ներկայացրել անհատ ճարտարապետներ, հեղինակային խմբեր և նախագծային կազմակերպություններ:
Նախարարի տեղակալ Ռուզան Ալավերդյանը ողջունելով մրցույթի մասնակիցներին և ներկաներին, փաստել է, որ մասնակցության նպատակով ներկայացվել են երկու տասնյակից ավել հայտեր, ընդ որում, կարևորելով, որ մրցույթ-ցուցահանդեսի նկատմամբ մեծ հետաքրքրություն են ցուցաբերել հատկապես երիտասարդ ճարտարապետները:
Անդրադառնալով տարվա կտրվածքով արժանավոր նախագծերը և կառույցները բացահայտող ցուցահանդեսների դերին և նշանակությանը, Ռ. Ալավերդյանը նշել է, որ այս համատեքստում լուրջ անելիքներ կան հատկապես մրցութային պայմանների և ներկայացվող աշխատանքների որակը բարելավելու առումով:
Կարդացեք նաև
Վերջում բոլոր մասնակիցներին շնորհվել է մասնակցության դիպլոմներ, իսկ 5 մասնակիցներ արժանացել են ՀՀ քաղաքաշինության նախարարի շնորհակալագրին:
ՀՀ քաղաքաշինության նախարարություն
