Վարչական դատարանում հունվարի 12-ին դատավոր Արման Թովմասյանը պետք է հրապարակեր Լեւոն Բարսեղյանի գործով վճիռը: Սակայն նա ասաց, որ պետք է վերսկսել քննությունը եւ ուսումնասիրել դատական վարչական գործը եւ պարզել գործի 9 նիստերին հայցվորի մասնակցությունը, որպեսզի պարզ դառնա նրա կրած նյութական վնասի չափը:
Հիշեցնենք՝ Լեւոն Բարսեղյանը պահանջում է ոստիկանությունից բարոյական վնասի փոխհատուցում մոտ երկու հազար եվրոյի չափով:
Դատական նիստ նշանակվեց սույն թվականի փետրվարի 22-ին:
Aravot.am-ի հետ զրույցում Լեւոն Բարսեղյանը դատարանի որոշումը անհեթեթ համարեց. «Փաստորեն ինքն իրենից ժամանակ է խնդրել, նորից պիտի ուսումնասիրի այդ գործը, ինչը բացարձակ անհեթեթություն է: Բան չունեմ ասելու՝ ինչքան ուզում է ուսումնասիրի, դատական ծախսերի փոխհատուցումը մենք ստանալու ենք: Այստեղ կլինի, կստանանք, վերաքննիչում կլինի կստանանք, վճռաբեկով կլինի, Մարդու իրավունքների եվրոպական դատարանով կլինի ես ստանալու եմ դատական ծախսերի փոխհատուցումը շատ հասարակ պատճառով, եթե չլինեին ոստիկանության ապօրինի գործողություններն իմ նկատմամբ մենք այդ դատական պատմության մեջ չէինք մտնի: Ոստիկանությունն ինձ անհանգստացրել է, հետո վարչական դատարանը ճանաչել է ոստիկանության գործողությունները որպես իմ սահմանադրական բազային իրավունքների խախտում, խոսքի ազատության, տեղաշարժի, հավաքների ազատության իրավունքների կոպիտ ոտնահարում է ճանաչել դատարանը:
Կարդացեք նաև
Դրա համար եմ ես դիմել դատարան, որպեսզի ճանաչվի, եթե իրենք իմ իրավունքները չոտնահարեին, ինձ անտեղի տեղը չձերբակալեին, չբռնեին տանեին ոստիկանություն, չպահեին այնտեղ երեք ժամ, ես այդ դատական գործով ոստիկանության դեմ չէի դիմի: Տարրական բան է սա, հասարակ բան է: Իրենց թվում էր այն ժամանակ՝ 4 տարի առաջ, փաստորեն, թե ինչ կուզեն կանեն, հետո տակից դուրս կգան: Հիմա հասկանում են, որ այդպես տակից դուրս գալով չի լինում՝ մարդուն անհանգստություն են պատճառել, դատարանն աննախադեպ վճիռ է կայացրել՝ ճանաչելով այդ իրավունքների խախտման փաստը, հիմա դրանց բոլոր կատարված դատական ծախսերի փոխհատուցումը պիտի ես ստանամ: Ուր ուզում է դիմի, ինչ դատարան ուզում է լինի, ես վերջ ի վերջո դա ստանալու եմ, ուզում է յոթ անգամ հետաձգի իր վճռի հրապարակումը»:
Ամի ՉԻՉԱԿՅԱՆ
