Սպորտի եւ երիտասարդության հարցերի նախարարի տեղակալ Արսեն Քարամյանը հունվարի 14-ին «Արմենպրես» լրատվական գործակալության մամուլի սրահում լրագրողների հետ հանդիպման ընթացքում անդրադարձավ նաեւ «Երիտասարդական մայրաքաղաք» ծրագրին: Նա նշեց, որ չորեքշաբթի նախարարությունում աշխատանքային խորհրդակցություն է կայացել Գյումրիի փոխքաղաքապետի եւ այլ ներկայացուցիչների հետ, որոշակի համաձայնության են եկել:
«Գյումրին սպեցիֆիկ քաղաք է, իր մշակութային լուրջ ներգրավվածությամբ, հետեւաբար՝ եթե գործ ունես այդպիսի մշակութային լուրջ ավանդույթներ, սպորտային լուրջ արդյունքներ գրանցած քաղաքի հետ, ապա մեզ մնում է միայն որոշակիորեն աջակցել իրենց: Իրենք ունեն լավ նախանշած մոտեցումներ եւ բավարար ներուժ այդ մոտեցումները առաջ տանելու համար: Մենք՝ որպես նախարարություն, ուղղակիորեն Գյումրիի պարագայում ավելի շատ օժանդակողի դերում ենք հանդես գալու, քան կազմակերպչի»,- ասաց նա:
Արսեն Քարամյանը նշեց, որ երիտասարդական մայրաքաղաք ծրագրով Սիսիանին հատկացվել էր մոտավորապես 61 միլիոն դրամ, իսկ Ստեփանավանին՝ 52 միլիոն, նա վստահություն հայտնեց, որ Գյումրին այդ գումարներից ոչ պակաս գումար կստանա ծրագիրն իրականացնելու համար. «Դուք պատկերացրեք, որ այդ գումարը կարող էր չհոսել, այս պահին հոսում է: Եվ դա նշանակում է՝ հանրային սննդի կետերից մինչեւ տաքսի մեքենա աշխատում են, այսինքն՝ այդ փողը տարաբաշխվում է տվյալ քաղաքի ամենատարբեր ոլորտներում:
Ամի ՉԻՉԱԿՅԱՆ
