Պայմանագրային զինծառայող, Լոռու մարզի Օձուն գյուղի բնակիչ, 1988թ. ծնված Գարիկ Խեչիկյանին մեղադրանք է առաջադրվել այն բանի համար, որ նա լինելով Հայաստանի Հանրապետության պաշտպանության նախարարության սահմանապահ զորամասերից մեկի զինծառայող, պարտավոր լինելով 2014թ. փետրվարի 12-ին ներկայանալ ծառայության վայր, ծառայությունից վերջնականապես խուսափելու նպատակով ծառայության չի ներկայացել, մեկնել է Ռուսաստանի դաշնություն, 2014թ. դեկտեմբերի 16-ին հայտնաբերվել է ՌԴ իրավապահների կողմից եւ 2015թ. նոյեմբերի 25-ին տեղափոխվել Հայաստան:
Գ. Խեչիկյանը գտնվում է կալանքի տակ: Նրան մեղադրանք է առաջադրվել ՀՀ քրեական օրենսգրքի 362 հոդվածի 1-ին մասով («Զորամասը կամ ծառայության վայրն ինքնակամ թողնելը»):
Ըստ «Դատալեքս» դատական տեղեկատվական համակարգի՝ սույն քրեական գործով դատավարությունը Տավուշի մարզի առաջին ատյանի դատարանում կսկսվի հունվարի 20-ին:
Ոսկան ՍԱՐԳՍՅԱՆ
