«Ազատ դեմոկրատներ» կուսակցության փոխնախագահ Անուշ Սեդրակյանն այսօր անդրադարձավ ԵԽԽՎ-ում ընդունված ու չընդունված հակահայկական բանաձեւերին, խոսել դրանց հետեւանքների մասին:
Նման բանաձեւերի հայտնվելը ԵԽԽՎ-ում, տիկին Սեդրակյանը պայմանավորեց Հայաստանի վարկանիշով:
«Պետական վարկանիշը կարեւոր գործոն է դիվանագիտական ամբիոններում, իսկ հայտնի է, որ Հայաստանը շատ միջազգային կազմակերպությունների գնահատականներով, հաստատվել է մասամբ ազատ երկիր, բիզնես նախաձեռնությունները խեղդող, մենաշնորհները առաջ քաշող պետություն: Այս գնահատականները չեն խոսում Հայաստանի օգտին ու խաթարում են նրա միջազգային վարկանիշին»,- այսօր «Փաստարկ» ակումբում ասաց Անուշ Սեդրակյանը:
Նա կարեւորեց ԵԽԽՎ-ում հայկական պատվիրակության ներկայացուցչականությունը, դիվանագիտական կոնտակտներ հաստատելու հնարավորության հարցերը. «Ցանկացած պետություն իր վարկանիշով ազդում է այլ պետությունների որոշումների վրա: Եթե չունես վարկանիշ, գտնվում ես փլվող ինտեգրացիոն միավորի շրջանակներում, եթե ժողովրդավարությունը քո երկրում, մեղմ ասած, իմիտացիոն ժողովրդավարություն է, պարզ չէ՞ որ բոլոր այդ որոշումները կանխատեսելի կլինեն»:
Կարդացեք նաև
Տիկին Սեդրակյանի խոսքով, շատ փորձագետներ մեղադրանքներ են հնչեցնում ԵՄ-ի նկատմամբ, թե Հայաստանի հանդեպ երկակի չափանիշներ են կիրառում, բայց. «Ես հակադարձում եմ հարցով՝ իսկ Հայաստանում երկակի ստանդարտներ չե՞ն կիրառում: Ցույց ենք տալիս, որ իբրեւ թե բարեփոխում ենք դատական համակարգը, բայց առանց անկախ դատարաններ ունենալու, բարեփոխում ենք բիզնես ոլորտն՝ առանց բիզնես ունենալու: Այս ջայլամի քաղաքականությունն անընդունելի է աշխարհում, մենք ապրում ենք թափանցիկ աշխարհում»:
Արփինե ՍԻՄՈՆՅԱՆ
