Ադրբեջանը դարձյալ դժգոհություն է հայտնել ԵԱՀԿ Մինսկ խմբի գործունեությունից՝ նրան մեղադրելով անգործության մեջ: Այս մասին հաղորդում է contact.az-ը:
Գործակալությունը նշում է, որ երեկ Բաքվում տեղի ունեցած մամուլի ասուլիսին Ադրբեջանի արտգործնախարար Էլմար Մամեդյարովը քննադատել է Մինսկի խմբի՝ ԵԽԽՎ-ին արված ուղերձը, որով կոչ էր արվում այնպիսի քայլեր չձեռնարկել, որոնք կարող են խոչընդոտել Լեռնային Ղարաբաղի հարցի կարգավորմանը:
«Ես նամակներ եմ ուղարկել Ռուսաստանի, Ֆրանսիայի և ԱՄՆ-ի արտգործնախարարներին և նրանց ուշադրությանն եմ հասցրել Բաքվի դիրքորոշումը: Ադրբեջանը սուվերեն իրավունք ունի միջազգային հարթակներում բարձրացնել ցանկացած հարց, և ոչ ոք իրավունք չունի միջամտել նրա սուվերեն իրավունքին»,- ասել է Մամեդյարովը:
Ավելի վաղ ԵԱՀԿ Մինսկի խմբի գործողությունների վերաբերյալ նմանատիպ գնահատական էր հնչեցրել նաև Ադրբեջանի նախագահ Իլհամ Ալիևը:
Կարդացեք նաև
Հիշեցնենք, հունվարի 26-ին ԵԽԽՎ-ում քննարկման դրվեց և մերժվեց բրիտանացի պատգամավոր Ռոբերտ Ուոլթերի զեկույցը՝ «Բռնության աճը Լեռնային Ղարաբաղում և Ադրբեջանի մյուս օկուպացված տարածքներում»:
Ավելի վաղ՝ հունվարի 22-ին, ԵԱՀԿ Մինսկի խմբի համանախագահները կոչ էին արել ԵԽԽՎ-ին «զերծ մնալ այնպիսի քայլերից, որոնք կարող են վնասել ԵԱՀԿ Մինսկի խմբի մանդատին կամ բարդացնել ընթացող բանակցությունները»:
Պատրաստեց՝ Վիկտորյա ԱՆԴՐԵԱՍՅԱՆԸ
