Ինչպես ավելի վաղ հայտնել էինք, մի խումբ մտավորականներ միավորվել են Երեւանի պատմական շենք-շինությունները պահպանելու նախաձեռնության շուրջը: «Sputnik Armenia» միջազգային մամուլի կենտրոնում այսօր նրանք նշեցին, որ առաջիկայում հանդես են գալու մի շարք կառույցների պահպանության կոչով՝ իշխանություններին եւ մասնավոր հատվածին առաջարկելով ոչ թե քանդել, այլ վերականգնել հին Երեւանից մնացած պատառիկները:
«Շատ անգամ ասում են՝ այս շենքը սիրուն չէ, պետք է քանդել եւ գեղեցիկը կառուցել: Բայց սիրունը չափանիշ չէ, գուցե գեղեցի՞կն է չափանիշը, ոչ թե սիրունը»,-ասաց լրագրող, հաղորդավար Մարկ Գրիգորյանը:
Կարդացեք նաև
ՀՀ ժողովրդական արտիստ Հրանտ Թոխատյանն էլ հիշեցրեց, որ Թամանյանը դիմագիծ է հաղորդել Երեւանին, եւ հիմա պետք չէ անտեղի «շպարել» այդ դիմագիծը. «Այսօր Երեւանի վարդագույնը կորել է, ինչ այլանդակ գույն ասես՝ կա: «Ուրբանիզացիա» հասկացությունը մեր քաղաքի համար չէ, այն իր կոկիկությամբ է գեղեցիկ: Այսօր էլ մարդիկ հիանում են մեր քաղաքով, բայց մենք գիտենք մեր քաղաքի իրական դեմքն ինչպիսին է եղել: Ամեն շենքի համար պայքարելը «կապրիզ» չի: Մտավորականի խոսքն այսօր արժեզրկվել է: Երեւանը պետք է պաշտպանել, եթե սա էլ չկարողանաք անել, մեր հավաքն անիմաստ է»:
Սերգեյ Փարաջանովի տուն-թանգարանի տնօրեն Զավեն Սարգսյանի համոզմամբ էլ՝ ոչ մի պաշտոնյա եւ ճարտարապետ չեն փրկի հին շենքերը, որովհետեւ շահ ունեն. «Եթե «Դոլմաման» օգուտ է տալիս, հարկ է վճարում, պատկերացրեք՝ այդ հատվածում որքան բան կարելի է ստեղծել ու եկամուտ ապահովել հենց պետության համար: Բա ինչո՞ւ չեն ստեղծում: Փարիզում, օրինակ, հազարավոր հին կառույցներ կան, շատ փողոցներ 17-րդ դարից են մնացել, բայց մարդիկ հաճույքով ապրում են, դրանց ձեռք չեն տվել»:
Ասուլիսին ներկա մտավորականները նշեցին, որ իրենց պահանջն է՝ դադարեցնել պատմամշակութային հուշարձանների շարունակական ոչնչացումը և որդեգրել դրանց պահպանման, խնամքի և մշակութային ժառանգության վերականգնման պետական քաղաքականություն:
Լուիզա ՍՈՒՔԻԱՍՅԱՆ
