Ուղիղ մեկ շաբաթ առաջ տարբեր լրատվական կայքերում՝ Henaran.am, igyumri.com տեղեկություններ հայտնվեցին այն մասին, որ փետրվարի 7-ին Գյումրու «Շիրակ» օդանավակայանից Գյումրի-Մոսկվա թռիչքը մի քանի ժամով հետաձգվել է, քանի որ անհայտ անձը, ըստ որոշ լուրերի՝ ազգությամբ թուրք, ուղեբեռ է հանձնել, սակայն անձամբ չի ներկայացել հաշվառման՝ Մոսկվա թռնելու համար: Այնուհետ, ըստ վերոհիշյալ կայքերի, հայտնաբերել էին, որ անձնագիրը կեղծ է:
Այդ ժամանակ Aravot.am-ին պարզաբանեցին, որ այս պատմությունը կապված է եղել Իջևան քաղաքի բնակիչ Անդրանիկ Դովլաթբեկյանի հետ, որի ուղեբեռը գրանցել են, սակայն նա ուշացել է թռիչքից: Իսկ ուղեբեռը, ըստ ընդունված կարգի, հետ են վերադարձրել: Այսօր մեզ հետ կապ հաստատեց տվյալ թռիչքով Մոսկվա մեկնած Շիրակի մարզի բնակիչներից մեկը (անուն-ազգանունը չենք հրապարակում նրա խնդրանքով)՝որպես ականատես պատմելով, որ ինքնաթիռը մեկ ժամ ուշացումով է թռել, պիտի մեկներ իրիկունը ժամը 22.00-ին, մեկնել է 23.00-ին: Պատճառը, ըստ նրա, եղել է այն, որ օդանավակայանի անվտանգության աշխատակիցները, բարձրանալով ինքնաթիռ ու ընթերցելով 4 ուղեւորի անուն-ազգանուն, դուրս են հրավիրել նրանց ինքնաթիռից:
Անվտանգության աշխատակիցները սկզբում պահանջել են նրանց անձնագրերը ու հրահանգել իջնել ինքնաթիռից, վերջիններս հրաժարվել են իջնել, մյուս ուղեւորների մոտ, կարծես թե, անհանգստություն է սկսվել: Երկրորդ անգամ են հրահանգել իջնել՝ ավելի խիստ տոնով, այդ անգամ վերջիններս անձայն լքել են ինքնաթիռը: Այնուհետ իջեցրել են նրանց ուղեբեռը, որն արդեն իսկ ինքնաթիռում է եղել: Թե ինչո՞ւ են տվյալ անձանց իջեցրել, ինչի՞ մեջ էին նրանք կասկածվում, մյուս ուղեւորների համար այդպես էլ անհայտ է մնացել: Մեզ հետ կապ հաստատած ուղեւորը, որը գործերով մշտապես Մոսկվա գնացող-եկող է, խնդրում էր ճշտել, թե ինչո՞ւ նրանց իջեցրեցին, ի՞նչ էր պատահել: Ի դեպ, մեր զրուցակիցը հիշում էր, որ ուղեւորներից մեկը տարօրինակ ազգանունով էր, նրա ասելով՝ հենց Դովլաթբեկյան էր:
Մենք կապ հաստատեցինք «Զվարթնոց» օդանավակայանի մամլո քարտուղար Գևորգ Աբրահամյանի հետ՝ ճշտելու, թե ի վերջո ի՞նչ է իրականում կատարվել, ո՞ր մեկի ներկայացրած պատմությունն է ճիշտ. օդանավակայանից ու ոստիկանությունից պարզաբանում են, թե արտառոց ոչինչ չկա, պարզապես Իջեւանի բնակիչ Դովլաթբեկյանն է ինքնաթիռից ուշացել, ուղեւորներն էլ փաստում են, թե 4 հոգու ինքնաթիռից իջեցրել են: Գևորգ Աբրահամյանն ասաց, որ սա իր պարզաբանելու թեման չէ, դիմենք ոստիկանություն: Մենք դիմեցինք ՀՀ ոստիկանության լրատվական ծառայությունից, այստեղից էլ խորհուրդ տվեցին դիմել Ազգային անվտանգության ծառայություն: Այստեղից էլ նշեցին, որ 4 ուղեւոր իջեցնելու դեպք չի եղել:
Կարդացեք նաև
Այս թեմայի շուրջ ակնկալում ենք օդանավակայանի պատասխանատուների ճշմարիտ, իրականությանը համապատասխանող պարզաբանումները. ի վերջո ինքնաթիռում մոտ 200 ուղեւոր է եղել, մեծ մասը հենց Շիրակի մարզից ու մեզ ահազանգած ուղեւորի ասելով, հենց այդ օրը առավել մանրակրկիտությամբ են մարդկանց ուղեբեռը զննել:
Նունե ԱՐԵՎՇԱՏՅԱՆ
