Հայցվոր` Հայաստանի Հանրապետության քաղաքացի`
Զարուհի Համազասպի Փոստանջյան
Ծանուցման հասցե` Երևան, Բաղրամյան 19
Կարդացեք նաև
Պատասխանող` Հայաստանի Հանրապետության նախագահ`
Սերժ Ազատի Սարգսյան
Հասցե` Երևան, Բաղրամյան 26
ՀՀ վարչական դատարանին հայցադիմում
(վիճարկման հայց)
2016 թ. փետրվարի 12-ի ՆՀ- 175 –Ա որոշումը Գեորգի Կուտոյանին Հայաստանի Հանրապետության կառավարությանն առընթեր ազգային անվտանգության ծառայության տնօրեն նշանակելու վերաբերյալ որոշումը վերացնելու (անվավեր ճանաչելու) պահանջի մասին
Հայցի էությունը (գործի նկարագրություն) և պահանջը հիմնավորող փաստարկներ ու փաստեր
2016թ. փետրվարի 12-ին Սերժ Սարգսյանը հանդես գալով որպես Հայաստանի Հանրապետության նախագահ` կայացրել է ՆՀ- 175 –Ա որոշումը, համաձայն որի` Գեորգի Կուտոյանին նշանակել է Հայաստանի Հանրապետության կառավարությանն առընթեր ազգային անվտանգության ծառայության տնօրեն:
Սերժ Սարգսյանն այդ որոշումը հիմնավորել է «Հայաստանի Հանրապետության Սահմանադրության» 55-րդ հոդվածի 5-րդ կետով և «Ազգային անվտանգության մարմիններում ծառայության մասին» Հայաստանի Հանրապետության օրենքի 18-րդ հոդվածի 2-րդ մասով:
Վերը թվարկված հիմնավորումները օրենքով սահմանված բավարար պայմանը չեն ապահովում Հայաստանի Հանրապետության կառավարությանն առընթեր ազգային անվտանգության ծառայության տնօրեն նշանակելու համար:
2016թ. փետրվարի 12-ի ՆՀ- 175 –Ա որոշումը, հանդիսանալով իրավական ակտ, չի բավարարում իրավական ակտի ընդունման պահանջներին` չի բխում Հայաստանի Հանրապետության Սահմանադրության համապատասխան դրույթի և համապատասխան օրենքի պահանջներից: Սույն որոշումով չեն պահպանվել Հայաստանի Հանրապետության Սահմանադրությամբ նախատեսված պետական պաշտոնատար անձի կողմից պարտականությունը` կատարել միայն այնպիսի գործողություն, որի համար պաշտոնատար անձը լիազորված է օրենքով:
Վիճարկվող որոշումն ընդունելիս` Սերժ Սարգսյանը, հանդես գալով որպես պետական պաշտոնատար անձ, անտեսել է «Ազգային անվտանգության մարմիններում ծառայության մասին» Հայաստանի Հանրապետության օրենքի 19-րդ հոդվածի 1-ին կետը` ազգային անվտանգության մարմինների ծառայողին պաշտոնի նշանակելու պայմանները, որով ամրագրված է հետևյալը. «պետական լիազոր մարմնի ղեկավար կարող է նշանակվել ազգային անվտանգության մարմինների այն ծառայողը, ով մինչեւ նշանակումն զբաղեցրել է ազգային անվտանգության մարմինների ծառայողների բարձրագույն խմբի պաշտոն կամ վերջին երեք տարին զբաղեցրել է գլխավոր խմբի պաշտոն եւ ունի գնդապետից ոչ ցածր կոչում»:
Հիմք ընդունելով Հայաստանի Հանրապետության Սահմանադրության 55-րդ հոդվածի 5-րդ կետը` Սերժ Սարգսյանն օգտագործել է Հայաստանի Հանրապետության նախագահի լիազորությունը, սակայն այդ լիազորության օգտագործումը տեղի չի ունեցել «Ազգային անվտանգության մարմիններում ծառայության մասին» Հայաստանի Հանրապետության օրենքի 19-րդ հոդվածի 1-ին կետին համապատասխան:
2016թ. փետրվարի 12-ի ՆՀ- 175 –Ա որոշումը հակասում է «Ազգային անվտանգության մարմիններում ծառայության մասին» Հայաստանի Հանրապետության օրենքի 19-րդ հոդվածի 1-ին կետի պահանջներին:
Պարոն Գեորգի Կուտոյանը Հայաստանի Հանրապետության ազգային անվտանգության ծառայությունում համապատասխան ծառայության փորձ չունի` նա չի զբաղեցրել համապատասխան պաշտոններ Հայաստանի Հանրապետության ազգային անվտանգության ծառայությունում և չի հանդիսացել Հայաստանի Հանրապետության ազգային անվտանգության ծառայության գնդապետ:
Պետական պաշտոնատար անձի, տվյալ դեպքում` Սերժ Սարգսյանի կողմից ընդունված վարչական ակտը, չբխելով օրենքի պահանջներից, անմիջականորեն խախտում է իմ Հայաստանի Հանրապետության քաղաքացու` հարկատուիս իրավունքը` ունենալ համապատասխան որակավորում և աշխատանքային փորձ ունեցող բարձրաստիճան ղեկավար պաշտոնյա: Վիճարկվող որոշումը կարելի է բնորոշել արտոնության շնորհում` զբաղվել ազգային անվտանգության ծառայության ղեկավար գործունեությամբ առանց համապատասխան մասնագիտական որակավորման:
Հայցի պահանջը
2016թ. փետրվարի 12-ի ՆՀ- 175 –Ա որոշումը Գեորգի Կուտոյանին Հայաստանի Հանրապետության կառավարությանն առընթեր ազգային անվտանգության ծառայության տնօրեն նշանակելու վերաբերյալ որոշումը վերացնել (անվավեր ճանաչել):
Գրավոր ապացույցների ցանկը
- 2016 թ. փետրվարի 12-ի ՆՀ- 175 –Ա որոշման պատճեն
- Գեորգի Կուտոյանի կենսագրություն
Հիմք ընդունելով վերոգրյալը և ղեկավարվելով Հայաստանի Հանրապետության վարչական դատավարության օրենսգրքի 3-րդ, 66-րդ և 72-րդ հոդվածներով` խնդրում եմ հայցադիմումն ընդունել վարույթ և իրականացնել դատաքննություն:
Կից ներկայացնում եմ`
- Պետական տուրքի վճարման անդորրագիր
- 2016 թ. փետրվարի 12-ի ՆՀ- 175 –Ա որոշման պատճեն
- Գեորգի Կուտոյանի կենսագրություն
- Անձնագրի պատճեն
- Հավաստագիր հայցադիմումի օրինակը պատասխանողին տրամադրելու վերաբերյալ
15.02.2016թ.
Հայցվոր` Զարուհի Համազասպի Փոստանջյան
