«էսօր գալիս կեղծավորի նման ծաղկեպսակներ են դնում էդ նույն Բարգավաճները, ՕԵԿ-ները Դաշնակներն ու չգիտեմինչերը, որոնք ուղղակի արդարացրեցին էդ սպանդով իշխանություն պահելը, ամո՛թ է: Էսօր Վարդան Օսկանյանները եւ Ռոբերտ Քոչարյանները նորից հայտ են ներկայացնում քաղաքական դաշտ մտնելու ու իշխանության գալու, դա անթույլատրելի է»,- այսօր Մարտի 1-ի զոհերի հիշատակին հարգանքի տուրք մատուցեց «Հանրապետություն» կուսակցության նախագահ Արամ Սարգսյանը եւ իր դժգոհությունը հայտնեց, երբ տեսավ ԲՀԿ անդամներին՝ Նաիրա Զոհրաբյանին, Մյասնիկյանի արձանի մոտ ծաղիկներ դնելիս:
Մենք ճշտեցինք ՝ո՞րն եք համարում այդ հայտը, որը ներկայացրել է Քոչարյանը՝ նորից վերադառնալու, այսինքն ի՞նչ են արել, այն, որ հարցազրույցներով Քոչարյանը ժամանակ առ ժամանակ քննադատում է Սերժ Սարգսյանի իշխանությանը, համեմատություններ է անում, դա՞ եք հայտ համարում, թե՞ ավելի ռեալ քայլեր եք նկատել՝ Արամ Սարգսյանը պատասխանեց. «Այն մարդը, ով Մարտի 1-ից հետո քաղաքական բոլոր շրջանակներում՝ արտաքին քաղաքական, համոզում էր, որ դա պարտադրված քայլ էր, ու դա պետք էր անել, հասարակությունը դուրս էր եկել վերահսկողությունից եւ ամբողջությամբ պետական հեղաշրջման վրա է, այդ մարդն այսօր քաղաքական կուսակցություն է ուզում ստեղծել, խոսում է երկրում եղած վատ իրավիճակից եւ այդ կուսակցության համար անդամներ է հավաքագրում՝ դա հստակ հայտ է: Ով է այդ մարդու հետեւում՝ դա իմ ենթադրությունն է, եւ կարծում եմ, իմ ենթադրության առումով ես բացարձակ օրիգինալ չեմ: Հասարակության եւ լրատվական դաշտի 99.9 տոկոսը Վարդան Օսկանյանի հետեւում տեսնում է Ռոբերտ Քոչարյանին, ու այստեղ ապացուցելու որեւէ խնդիր չունեմ»:
Հռիփսիմե ՋԵԲԵՋՅԱՆ
