Տարածաշրջանային մի շարք հարցեր քննարկելիս Կովկասի ինստիտուտի փոխտնօրեն, քաղաքագետ Սերգեյ Մինասյանը «Անդրադարձ» մամուլի ակումբում խոսեց նաև Հայաստան-Ադրբեջան հակամարտության մասին: Նա ասաց, որ լարվածությունը վերանալ չի կարող, բայց վերջին երկուսուկես ամիսներին իրավիճակը համեմատականորեն ավելի մեղմ է, ինչը բացատրվում է մի շարք գործոններով:
«Մի կողմից աշխարհաքաղաքական համատեքստն է, մյուս կողմից՝ Ադրբեջանում խորացող տնտեսական ճգնաժամն է՝ կապված նավթի գնի անկման հետ: Նման իրավիճակում հարևան պետությունն իրեն չի կարող թույլ տալ նույն չափով զենքի սպառում: Բնականաբար, Ադրբեջանը ժամանակ առ ժամանակ կփորձի ուշադրություն հրավիրել իր վրա՝ սահմանին գործողություններ կատարելով, սակայն չի կարող դուրս գալ այն ծուղակից, որում հայտնվել է տարիներով վարած քաղաքականության պատճառով»,- մեկնաբանեց Մինասյանը:
Քաղաքագետը պնդում է, որ ռուսական մամուլում վերջերս տեղադրված Հայաստանի ու ԼՂՀ-ի ռազմական ռեսուրսների մասին տեղեկությունը առնվազն տասը տարվա վաղեմության է, ուստի ներկայի համար ճշգրիտ չէ: «Մանրամասն վերլուծություն գրող ու ինչ-որ թվեր ներկայացնող ամեն մարդ չէ, որ պրոֆեսիոնալ վերլուծաբան է: Իր հոդվածում ռուս վերլուծաբանը սխալ տվյալներ էր հրապարակել ոչ միայն Հայաստանի ու ԼՂՀ-ի, այլև Հայաստանի ռուսական ռազմաբազայի մասին: Պետական գաղտնիք այստեղ լինել չի կարող, ինֆորմացիան չի սպառնում ազգային անվտանգությանը», -բացատրեց Մինասյանը:
Կարդացեք նաև
Շուշան ԳԱԼՍՏՅԱՆ
