Ադրբեջանցիները փորձել են երկու կողմերից մտնել Ղարաբաղ: Եթե այդ երկու անցումները ստացվեր, դրան կհետեւեր կենտրոնից հարձակումը Ստեփանակերտ քաղաքի վրա:
«Ադրբեջանցիների այս փուլի նպատակը՝ առաջին պլանը ձախողվել է: Սա արձանագրենք»,- այսօր ԱԺ-ում լրագրողների հետ զրույցում հայտարարեց Մարտակերտից գիշերը վերադարձած պատգամավոր Նիկոլ Փաշինյանը:
Նա ասաց. «Ադրբեջանցիները փորձել են երկու կողմերից մտնել Ղարաբաղ: Ըստ էության, կարելի է չկասկածել՝ եթե այդ երկու անցումները ստացվեր, դրան կհետեւեր կենտրոնից հարձակումը Ստեփանակերտ քաղաքի վրա: Բայց քանի որ մեր զորքերը կարողացել են ե՛ւ հյուսիսում, ե՛ւ հարավում ներխուժման փորձը կասեցնել, նրանք հասկացել են, որ պլանը չի հաջողվում իրականացնել: Նրանց հայտարարությունը, որ մենք միակողմանիորեն զինադադարի պատրաստ ենք, նաեւ սրա հետ է կապված, որովհետեւ նրանք հասկացան, որ իրենց պլանը չիրագործվեց եւ իրենց կարող է դադար պետք լիներ՝ իրավիճակը վերլուծելու եւ նոր հարձակում ձեռնարկելու համար»:
Aravot.am-ի հարցին՝ լուրեր տարածվեցին Մարտակերտի 2-3 դիրք կորցնելու, այնուհետեւ նաեւ հետ գրավելու մասին, ի՞նչ տեղեկություններ ունեք այս մասին: Նա պատասխանեց. «Եկեք դիրքերի հետ կապված հետեւենք պաշտոնական լրատվությանը, ռազմական գերատեսչությունների հաղորդագրություններին, որովհետեւ միայն նրանք են, որ օպերատիվ իրավիճակին տիրապետում են»:
Կարդացեք նաև
Մեր հարցին՝ մի լավ լուր կարո՞ղ եք ասել Մարտակերտից՝ Նիկոլ Փաշինյանը պատասխանեց. «Ես այսօր մտադիր եմ ԱԺ հայտարարության ժամին հանդես գալ, լավ լուրը թույլ տվեք հայտնել այդ ձեւաչափում»:
Հռիփսիմե ՋԵԲԵՋՅԱՆ
