«Այսօր պաշտոնյաներն էլ են առաջին գծում, իրենց բարեկամներն էլ: Խնդրում եմ, գոնե այսօր, հասարակությունը մի բաժանեք պաշտոնյաների եւ ռամիկների: Բոլորս Հայաստան աշխարհի զավակներն ենք: Այն երեխաները, որոնք զոհվում են`մեր երեխաներն են»,- խորհրդարանում լրագրողներից մեկի հարցին`պաշտոնյաների որդիները կմեկնե՞ն առաջին գիծ, պատասխանեց ՀՀ ԱԺ փոխխոսնակ Էդուարդ Շարմազանովը:
«Եվ մենք, եւ ընդդիմությունը հասկացել ենք`միգուցե հենց սա է այն փորձաքարը, որից պետք է ուժեղացած դուրս գանք եւ դասեր քաղած: Նաեւ ներքաղաքական պայքարի առումով: Հայաստանը բոլորի հայրենիքն է, ընդդիմությունը մեր թշնամին չէ: Ընդդիմությունը ոչ պակաս, եթե ոչ ավելի, շահագրգռված է մեր երկրի ամրապնդմամբ եւ ուժեղացմամբ»,- ասաց նա:
ԱԺ փոխխոսնակն ասում է`Հայաստանի թիվ մեկ խնդիրն այսօր հակառակորդին խաղաղություն պարտադրելն է: Նա վստահ է, որ ՀՀ-ում հավատարմագրված դեսպանները`ՀՀ նախագահի հետ երեկվա հանդիպումից հետո, Սերժ Սարգսյանի ուղերձները հստակ կփոխանցեն իրենց երկրների ղեկավարներին:
Առավոտյան հայտնի դարձավ, որ հակառակորդը կրակել է «Սմերչ» զինատեսակից: Լրագրողներից մեկը հիշեցրեց, որ ժամանակին, երբ ՌԴ-ն Ադրբեջանին զենք էր վաճառում, հայաստանյան պաշտոնյաները հավաստիացնում էին`դա մեզ վրա չի կրակի: Էդուարդ Շարմազանովն ասաց, որ իրենք միշտ էլ քննադատել են ՌԴ-ի կողմից Ադրբեջանին զենքի վաճառքի փաստը եւ հավելեց, որ ՀՀ-ն գործել ու գործելու է բացառապես իր շահի տեսանկյունից:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
Լուսանկարը՝ արխիվային. ԱԺ պատգամավորները Տավուշի մարզում
