«Ժողովուրդը պիտի հաղթի, երկար տարիներ նա տեսել է ամեն ինչ: Այսօր նա պետք է խելոք լինի ու հասկանա, այս վիճակից դուրս գա: Ես համոզված եմ, որ ժողովուրդը ճիշտ քվեարկություն կանի»,- Հրազդանում այսօր անցկացվող տեղական ինքնակառավարման մարմինների ընտրություններում քվեարկելուց հետո Aravot.am-ի հետ զրույցում ասաց Հրազդանի քաղաքապետի թեկնածու, «Քաղաքացիական պայմանագիր» կուսակցության անդամ Սասուն Միքայելյանը:
Elections of the mayor of Hrazdan
Նրա դիտարկմամբ՝ բազմաթիվ ընտրախախտումներ են եղել. «Ժողովուրդը պետք է հասկանա, որ գումար բաժանելով… տարիների ընթացքում այդ գումարները մեր ժողովրդից կեղեքելով՝ այսօր գալիս գումար են բաժանում, որ նորից ընտրվեն: Ժողովուրդը պետք է խելոք լինի… Ես հնարավոր ամեն ինչ արել եմ, ծառայել եմ իմ ժողովրդին երկար տարիներ: Այսօր գնահատականը թող նա տա: Ժողովուրդը պիտի իր վաղվա օրը, իր երեխայի ապագան ընտրի»,- ընդգծեց Ս. Միքայելյանը:
Ըստ նրա՝ այս ընտրություններում թափանցիկություն հասկացություն չկա. «Արդեն քանի օր է՝ գումար են բաժանում, թափանցիկությունը ո՞րն է»:
Մեր այն հարցին, թե արդյո՞ք երկու թեկնածուներն էլ գումար են բաժանում, Միքայելյանը պատասխանեց. «Չէ, չէ, Միսակյան Արթուրին որտեղի՞ց գումար, որ բաժանի: Ընտրակաշառքները Դանիելյան Արամի կողմից են բաժանվում»:
Կարդացեք նաև
Արամ Դանիելյանն իր հերթին լրագրողների հետ զրույցում դա որակեց իբրև հերյուրանք:
Հիշեցնենք, որ Հրազդանի քաղաքապետի պաշտոնի համար պայքարում են գործող քաղաքապետ, ՀՀԿ անդամ Արամ Դանիելյանը, «Քաղաքացիական պայմանագիր» կուսակցության անդամ Սասուն Միքայելյանը և «Հայկական վերածնունդ» կուսակցության կողմից առաջադրված թեկնածու Արթուր Միսակյանը:
Սիրանուշ ՀԱՅՐԱՊԵՏՅԱՆ
