Քրդամետ «Ժողովուրդների դեմոկրատական» կուսակցության խորհրդարանական խմբակցության անդամ, պատգամավոր Գարո Փայլանը մեկնաբանել է 2016թ. մայիսի 2-ին Թուրքիայի Ազգային մեծ ժողովի Սահմանադրական հանձնաժողովի նիստի ընթացքում տեղի ունեցած ծեծկռտուքը, որին ներկա էր նաև ինքը։ Այս մասին տեղեկացնում է Bianet.org-ը։
Փայլանն ասել է, որ վեճը սկսվելուց առաջ Թուրքիայի իշխող «Արդարություն և զարգացում» կուսակցության պատգամավորներն իրար ասել են. «Գարոն այստեղ է, Գարոն այստեղ է»։ Փայլանի խոսքով՝ իրեն մեղադրում են նիստի ընթացքում սադրանքներ հրահրելու մեջ, որի հետևանքով էլ առաջացել է ծեծկռտուքը։ Հայազգի պատգամավորը կտրականապես հերքել է այդ պնդումները, ասելով, որ նիստի սղագրությունները պահպանվել են, և ինքը որևէ սադրիչ արտահայտություն չի հնչեցրել։
Քրդամետ «Ժողովուրդների դեմոկրատական» կուսակցության հայազգի պատգամավորը մեկնաբանել է նաև բուն ծեծկռտուքի պահը. «Ակնհայտ է, որ ինձ թիրախ էին դարձրել։ Մի քանի պատգամավորների հստակ նշանակետը ես էի, շուրջ 20-30 վայրկյան թիրախը ես էի, և այդ ընթացքում ստացա բռունցքի շուրջ 100 հարված»։
Փայլանն ասել է, որ չի պատրաստվում դատի տալ իրեն հարվածողներին՝ տեղի ունեցածը թողնելով Սահմանադրական հանձնաժողովի խղճին։ Փայլանն ասել է նաև, որ իր՝ հարձակման ենթարկվելու պատճառներից մեկը հայ լինելն է. «Այնտեղ հնչած ատելությամբ լի արտահայտությունները վերաբերվում էին իմ ազգային պատկանելությանը։ Նրանք չկարողացան մարսել, որ ոմն հայ շիտակ կանգնում և բացահայտում է իրենց ստերը»։
Կարդացեք նաև
