«Դրանք ապացույց են, որ մարդը մասնակցել է ընտրությունների, անհրաժեշտության դեպքում կարելի կլինի օբյեկտիվ չափանիշներով ուսումնասիրություն կատարել»,- սա Կառավարության աշխատակազմի ղեկավար-նախարար Դավիթ Հարությունյանի հիմնավորումն է այն հարցին, թե ինչո՞ւ են ընտրական գործընթացներում մատնահետքեր վերցվում ընտրողներից, եթե դրանք չեն համեմատվելու:
Դավիթ Հարությունյանն ասում է, որ դա արվել է տեխնիկական ապահովման մասնագետների առաջարկով, քանի որ տեխնիկապես հնարավոր չէ հազարավոր տվյալների ճշգրիտ համեմատությունը: Սխալների չափը կարող է այնպիսին լինել, որը կվտանգի ընտրությունների արդյունքները:
Այսօր, ԱԺ պետաիրավական հարցերի մշտական հանձնաժողովի նիստում Դավիթ Հարությունյանը ներկայացնում էր այն փոփոխությունները, որոնք կատարվել էին առաջինից երկրորդ ընթերցման ընթացքում: Քվեարկությունները տեղափոխվեցին երկուշաբթի, մինչեւ փոփոխությունների ամփոփաթերթը տրամադրվեն պատգամավորներին:
Նիստին, ի դեպ, ՀԱԿ-ի, «Ժառանգության» եւ ԲՀԿ-ի ներկայացուցիչները չէին մասնակցում:
Կարդացեք նաև
Այն, որ «4+4+4» ձեւաչափում համաձայնություն չկայացավ, Դավիթ Հարությունյանը հոգ չի համարում, քանի որ կարծում է, որ համաձայնությունների կարելի է գալ անգամ նախագծի ընդունումից հետո`փոփոխություններ կատարելով: Բայց ինքը պատրաստ է այն քննադատություններին, որոնք միջազգային կառույցները հնարավոր է ուղղեն ՀՀ իշխանություններին`ԸՕ-ն ոչ կոնսենսուսային կարգով ընդունելու համար:
Այլ մանրամասները`տեսանյութում
Նելլի ԳՐԻԳՈՐՅԱՆ
