Ապրիլյան պատերազմում հայկական կողմի տարածքային կորուստները Առաջին հետախուզադիվերսիոն ջոկատի հրամանատար, ազատամարտիկ Վովա Վարդանովը «կորուստ» չի համարում: «Դրանք պարզապես ժամանակավորապես թուրքի ձեռքում են, ինչպես եւ Բաքուն»,- այսպես է բնորոշում նա:
«Հենարան» մամուլի ակումբում մայիսի 25-ին Վարդանովը տեղեկացրեց, որ այն օգտագործվող տարածքները, որոնք հիմա հայկական կողմի ձեռքում չեն, կազմում են 20-30 հեկտար. «Նկատի ունեմ խրամատների զոնաները: 700 հեկտար որ ասում են, նկատի ունեն նոր առաջացած «չեզոք գոտին», որովհետեւ հյուսիսում եւ հարավում կորցրած տարածքները 20-30 հեկտար են` ռազմական հաշվարկով` մոտավորապես խրամատների տարածքն են, որը «պահպանվող գոտի» էր, որտեղ մուտքն արգելված էր եւ այլն: Հիմա այդ դիրքերին ավելացել է «չեզոք գոտին», որն առաջացել է մեր նոր ստեղծված դիրքերի եւ նախկին դիրքերի արանքում»:
Վարդանովի բնորոշմամբ, այդ տարածքներն, անկասկած, կարեւոր նշանակություն ունեն. «Ստրատեգիական նշանակություն չունեն, որովհետեւ մեկ դիրքը չի կարող «ստրատեգիական» նշանակություն ունենալ: Իսկ ահա տակտիկական նշանակություն, անկասկած, ունի»:
Բանախոսը նաեւ նշեց, թե ինչով է կարեւոր ներկայումս ադրբեջանական կողմի վերահսկողության ներքո գտնվող «Լելեթեփե» բարձունքը. «Արաքսի ձախակողմյան հատվածը համեմատաբար հարթավայրային է, իսկ «Լելեթեփեն» փոքր, բայց բարձունք է, որի վրայից ավելի հեռուն ես տեսնում…»:
Կարդացեք նաև
Հիշեցնենք, որ ՀՀ Պաշտպանության նախարար Սեյրան Օհանյանը մեկնաբանել էր 800 հեկտար տարածքի կորուստը:
Այլ մանրամասները` տեսանյութում
Լուիզա ՍՈՒՔԻԱՍՅԱՆ
