«Ինչ-որ մի հանդիպում կլինի հունիսին, բայց այդ հանդիպումը կլինի անարդյունք: Ադրբեջանը հայտարարում է, որ ցանկացած լուծում պետք է լինի տարածքային ամբողջականության սկզբունքից ելնելով»,- այսօր «Փաստարկ» ակումբում խոսելով Ալիեւ-Սարգսյան հնարավոր հանդիպման մասին՝ ասաց «Մոդուս Վիվենդի» կենտրոնի ղեկավար Արա Պապյանը:
Հարցին՝ ի՞նչ տվեց Վիեննայի հանդիպումը՝ Արա Պապյանը պատասխանեց. «Եթե սպասելիք ասելով նկատի ունենք հակամարտության լուծում, կարծում եմ, որեւէ առաջընթաց այդ առումով չկա: Միակ առաջընթացը կլինի հետաքննող սարքերի տեղադրումը, դա առայժմ խոստում էլ մնաց»:
Միակ միջոցը հակառակորդին զսպելու, ըստ Արա Պապյանի, կոռուպցիան հաղթահարելն է, ներքին խնդիրները լուծելը, ուժեղանալը, լուրջ ռազմամթերք ձեռք բերելը, որը կզսպի նրան:
Ինչ վերաբերում է 800 հա տարածքին, Արա Պապյանի խոսքերով՝ «Չքննարկենք շատ է դա, թե քիչ, սա խորհրդանիշ է, առաջին անգամ հայկական կողմը կորցրեց, Ադրբեջանը տարածք ձեռք բերեց»:
Կարդացեք նաև
Մեր հարցին՝ Սամվել Բաբայանը ռուսական 200 մլն վարկով ձեռք բերվող զենքերի հետ կապված ասել էր, որ դա թյուրիմացություն է, երբ նույն զինատեսակներն ենք ձեռք բերում, ինչ Ադրբեջանը: Այս առնչությամբ մեր հարցին ի պատասխան՝ Արա Պապյանն ասաց. «Սամվել Բաբայանի հիմնական տեսակետը հետեւյալն է՝ պետք է ձեռք բերել այնպիսի զինատեսակներ, որոնք կապահովեն պաշտպանությունը: Եթե իրենք կոտորում են խաղաղ բնակչությանը, մենք ի պատասխան կոտորում ենք իրենց խաղաղ բնակչությանը, սա անհեռատես է, որովհետեւ այս առումով մենք այնքան ռեսուրսներ չունենք, որ կարողանանք մտնել նրա հետ մրցավազքի մեջ:
Եթե հնարավորություն կա նոր համակարգերով ապահովել երկրի պաշտպանությունը՝ հակաօդային, հակահրթիռային, դա պետք է զարգացնել, նաեւ պատժիչ մեխանիզմներ ունենալ: Ադրբեջանը նոր չէ, որ արտադրում է զենքեր, համատեղ ձեռնարկություն ունի Թուրքիայի հետ: Մենք, չգիտես ինչու, Ադրբեջանի բոլոր հայտարարությունները՝ Զանգեզուրը գրավելու մասին, լուրջ չենք ընդունել՝ հույսներս դնելով արտաքին ուժերի վրա, որ պետք է զսպեն: Եթե հույսներս դնում ենք ՌԴ-ի վրա, որ պետք է զսպի, մենք պետք է հասկանանք, որ ՌԴ-ն չի ուզում եւ չի կարող: Մենք չենք կարող անընդհատ մտածել, որ Ադրբեջանի այդ հայտարարությունները ներքին սպառման համար են»:
Արա Պապյանի խոսքերով՝ «Ինչպես ոչ ադեկվատ մարդիկ կան, այդպես էլ ոչ ադեկվատ պետություններ կան: Այն սերունդը, որը այսօր հասունացել է Ադրբեջանում եւ գլուխ է կտրում, տոտալ ատելության մթնոլորտում է հասունացել»:
Հռիփսիմե ՋԵԲԵՋՅԱՆ
