Այսօր ԱԺ-ում քննարկվեց «ԱԱԾ մարմիններում ծառայության մասին օրենքում փոփոխություններ եւ լրացումներ կատարելու» նախագիծը, որով առաջարկվում է որոշ պաշտոններում գիտնականների ընդունել, որոնք բանակում չեն ծառայել:
ԲՀԿ խմբակցության ղեկավար Նաիրա Զոհրաբյանն էլ ասաց, որ բոլորս էլ գիտենք, թե ովքեր չեն ծառայում բանակում՝ դրանք պատգամավորների, օլիգարխների, նախարարների, տարբեր բարձրաստիճան պաշտոնյաների զավակներն են. «Մենք բոլորս էլ գիտենք, որ անհավասար պայմաններում է հայտնվում նա, ով չունի պատգամավոր, նախարար հայր, իսկ ունեցողը, չգիտես ինչու, բարձր մակարդակի գիտնական է»:
ԱԺ նիստը վարող Էդուարդ Շարմազանովին այս հարցադրումը դուր չեկավ. «Բազմաթիվ պատգամնավորի երեխեք կարող է լինեն շատ տաղանդավոր, կրա՞կն են ընկել, որ պատգամավորի երեխա են, չի կարելի ամեն ինչը սահմանափակել»:
Նա հորդորեց՝ բերեք էդ քառակուսի բաներից դուրս գանք:
Կարդացեք նաև
Նաիրա Զոհրաբյանն էլ տեղից վիճեց. «Քառակուսի բառը կարող է վերաբերվել բացառապես ձեր հայտարարություններին: Ձեր գնահատականներում եղեք առավելագույն կոռեկտ: Ես ինձ թույլ չեմ տվել ձեր գնահատականները անվանել քառակուսի, կլոր կամ եռանկյունի՝ չնայած ես բացարձակ դրա իրավունքը կարող էի ունենալ ձեր բազմաթիվ ելույթների հետ կապված»:
Նա պնդեց, որ բազմաթիվ պաշտոնյաների զավակներ բանակից խուսափելու համար ընդունվում են ասպիրանտուրա:
Շարմազանովն էլ արձագանքեց. «Ես տանձից եմ խոսում, դուք՝ խնձորից»:
Հռիփսիմե ՋԵԲԵՋՅԱՆ
