«ՀՀ իշխանություններն ապրիլյան պատերազմից հետո գոնե դեկլարատիվ մակարդակով հայտարարեցին, որ պայքար են սկսում կոռուպցիայի եւ մենաշնորհների դեմ: Սա խոսում է այն մասին, որ պատերազմն իշխանություններին պարտադրեց համապատասխան հետեւություններ անել եւ գնահատական տալ համակարգային մեծագույն արատների առկայությանը»,-կարծում է Քաղաքական և միջազգային հետազոտությունների հայկական կենտրոնի փորձագետ Ռուբեն Մեհրաբյանը:
«Այս ամենը, սակայն, դեկլարատիվ բնույթ է կրում: Եթե մենաշնորհների դեմ պայքարի շրջանակում «մենաշնորհ» ասելով` հասկանում ենք բանանի, շաքարի, կիտրոնի կամ նարնջի մենաշնորհ, լավ ենք անում, բայց ծիծաղելին այն է, որ մեզանում նույնիսկ այդ ոլորտներն են մենաշնորհված: Ավելի ծիծաղելի է, երբ այդ ոլորտների հետեւում չի երեւում մի խայտառակ մենաշնորհ, որը քամում է Հայաստանը` դա ՀՀ-ում ռուսական մենաշնորհներն են, մասնավորապես` գազի, նավթամթերքի մենաշնորհները, որոնք ՀՀ-ին վերածել են ռուսական «չուլանի», որտեղ լցվում է ամեն տեսակի աղբ»,-«Դեբատ» բանավեճի ակումբում հունիսի 6-ին ասաց Ռուբեն Մեհրաբյանը:
Նրա բնորոշմամբ` հատկապես վերջին երկու տարում հայկական սուպերմարկետները լցվել են «ռուսական աղբով», ՀՀ-ն էլ դարձել է դրա սպառողը. «Եթե ռուսները փորձեն այդ աղբը վաճառել ԵՄ-ում, անգամ այդ փորձի համար նրանց կտուգանեն, որովհետեւ դա «դիվերսիա» է, ոչ թե ապրանք: Ռուսական մենաշնորհները սպառնում են ՀՀ ազգային անվտանգությանը: Այսօր Էդվարդ Նալբանդյանը Թեհրանում է: Իրանական լրատվամիջոցները ցիտում են նրա իրանցի գործընկերոջ խոսքերը, համաձայն որոնց` ՀՀ-ի եւ Իրանի միջեւ երկաթուղային, գազի եւ էլեկտրաէներգիայի տարանցման ոլորտներում գործակցության խոչընդոտ չկա: Հիմա նայեք` ի՞նչ է կատարվում այդ ոլորտներում: Երկաթգիծը հանձնել ենք ռուսներին, գազն ամբողջությամբ` «Գազպրոմին», գազը բերում ենք Սիբիրից եւ մեզ դնում «խելոքի» տեղ այն դեպքում, երբ տարածաշրջանը ծփում է գազից ու նավթից: ՀՀ-ում բենզինն ավելի թանկ է, քան Վրաստանում, որովհետեւ Հայաստան նավթամթերքի ներկրման մոնոպոլիստը «Роснефть»-ն է»:
Այսպես, ըստ Ռուբեն Մեհրաբյանի, Հայաստանը դարձել է Պուտինի` նշյալ ոլորտները կառավարող «չեկիստ»-ընկերների գերին. «Ռուսաստանին, որն Ադրբեջանին զենք է վաճառում, տալիս ենք մեր երկնքի բանալիները… Ի՞նչ մենաշնորհի դեմ պայքար, ի՞նչ լիմոն ու շաքար, ինչի՞ մասին ենք խոսում: Այո, պայքարեք կոռուպցիայի եւ մենաշնորհի դեմ, բայց իրականում: Վերանայեք, թե ովքեր են մեր դաշնակիցները, իրական դաշնակիցները եւ թշնամիները: ՌԴ-ն այսօր հայկական պետականության թիվ մեկ սպառնալիքն է: ՀՀ-Ռուսաստան դաշինքը գլխակեր դաշինք է»:
Կարդացեք նաև
Մեհրաբյանի դիտարկմամբ` եթե Հայաստանը ոչինչ չի ձեռնարկում, պատերազմն անխուսափելի է. «Պատերազմից խուսափելու լավագույն տարբերակը ՀՀ կապերի դիվերսիֆիկացիան է, որը կբարձրացնի այդ պատերազմը հրահրելու քաղաքական գինը, եւ այն կդարձնի նույնիսկ անընդունելի` այդ պատերազմը հրահրողների համար: Եթե հասնենք դրան, կխուսափենք այդ պատերազմից»:
Լուիզա ՍՈՒՔԻԱՍՅԱՆ
