«Օֆշորի գործով» հունիսի 9-ին շարունակվեցին հարցաքննվել գործով վկաները: Դատական նիստի ընթացքում հարցաքննվեց վկա, Արտակարգ իրավիճակների նախարարությունում ֆինանսատնտեսագիտական վարչության պետի տեղակալ Վահագն Օհանյանը: Նա նշեց, որ նախկինում աշխատել է ֆինանսների նախարարության ֆինանսաբյուջետային վերահսկողության տեսչությունում որպես ավագ մասնագետ:
Վկան դատարանին հայտնեց, որ 2012 թվականին քրեական գործի շրջանակներում ստուգում է կատարվել, եւ ինքը, լինելով ստուգող խմբի անդամ, ստուգել է «Ձորագյուղ» արտադրական կոոպերատիվի ֆինանսատնտեսական փաստաթղթերը: Նա նշեց, որ փաստաթղթերի թերի լինելու կապակցությամբ տեղեկանք է կազմել. «Ստուգումը տաս օր է տեւել, ակտ չի կազմվել: Քանի որ փաստաթղթերը կիսատ էին ղեկավարի համաձայնությամբ կատարել եմ որոշակի վերլուծություններ»:
Գործով տուժող Փայլակ Հայրապետյանի ներկայացուցիչ Շալիկո Փիրուզյանը Վահագն Օհանյանից հետաքրքրվեց, թե արդյոք բանկային գումարներից վարկառուն (գործով ամբաստանյալ Աշոտ Սուքիասյանը) իրավո՞ւնք ուներ ոսկու ձուլակտորներ գնել, վկան պատասխանեց, որ հարցին չի կարող պատասխանել. «Բանկային մասնագետը կարող է պատասխանել այդ հարցին, որովհետեւ ինչ նպատակով է տրվել վարկը եւ ինչ նպատակով է օգտագործվել, ֆինանսատնտեսական ստուգման շրջանակներից դուրս է»:
Շալիկո Փիրուզյանը հետաքրքրվեց, թե ստուգման ընթացքում որեւէ փաստաթուղթ իրենց ներկայացրե՞լ են, որ «Ձորագյուղ» արտադրական կոոպերատիվը ինչ-որ սարքավորումներ է ձեռք բերել: Վկան պատասխանեց, որ նշված չէ, թե արդյոք Աշոտ Սուքիասյանը փաստաթղթեր տրամադրե՞լ է, թե՞ ոչ:
Կարդացեք նաև
Ամի ՉԻՉԱԿՅԱՆ
