2016թ. հուլիսի 14-ին երեկոյան Ֆրանսիայի Նիս քաղաքում տեղի ունեցած ահաբեկչական գործողությունը կազմակերպելու գործում առաջինը շրջանառվում է «Իսլամական պետություն» ահաբեկչական խմբավորման անունը։ Այս մասին տեղեկացնում է բրիտանական The Daily Mail-ը։
Տեղեկությունների համաձայն՝ 31-ամյա տղամարդը, որը ծագումով թունիսցի էր, բեռնատար հսկայական մեքենայով մխրճվել է մարդկային բազմության մեջ, այնուհետև սկսել կրակել նրանց ուղղությամբ։ Ահաբեկչի գործողությունների հետևանքով արդեն իսկ զոհվել է 84. վիրավորվել շուրջ 50 քաղաքացի։ Դրանից հետո 31-ամյա տղամարդը փորձել է փախուստի դիմել, բայց սպանվել է ոստիկանների գործողությունների արդյունքում։
Լրատվամիջոցի փոխանցմամբ՝ սպանվելուց առաջ ահաբեկիչը բարձրաձայն բղավել է «Ալլահու աքբար»։
Բրիտանական լրատվամիջոցը հայտնում է նաև, որ «Իսլամական պետություն» ահաբեկչական խմբավորման շառավիղները համարվող խմբերն արդեն «տոնում են» Նիսի ահաբեկչությունը, ինչից կարելի է եզրակացնել, որ 80-ից ավելի մարդու կյանք խլած ահաբեկչության հետևում կանգնած է «Իսլամական պետություն» ահաբեկչական խմբավորումը։
