Aravot.am-ը հուլիսի 20-ին Խորենացի փողոցում կայացած ցույցի ժամանակ հանդիպեց գուսան Հայկազունին (Գագիկ Նազարյան), որը մի շարք հայրենասիրական երգերի հեղինակ է, Հայաստանի Հանրապետության մշակույթի վաստակավոր գործիչ: Հետաքրքրվեցինք, թե ինչ կարծիքի է կատարվող իրադարձությունների վերաբերյալ՝ որպես Արցախյան պատերազմի մասնակից։
«Այս ամենը շատ վատ եմ տանում, ինչպես ցանկացած հայ մարդ, չպետք է լիներ նման դեպք, ցավում եմ եւ վիրավորների եւ զոհված ոստիկանի համար: Ի վերջո բոլորը հայ են; Բայց ես ավելի մեծ վախ ունեմ՝ ո՞վ գիտի, գուցե մի ուրիշ տեղ հիմա նույն բա՞նն է պատրաստվում: Այսինքն՝ նախ պատճառները պետք է վերացնել: Քանի կան ծնող պատճառները, ավելի վատ բաներ ենք տեսնելու՝ ախր սոցիալական վիճակ, արտագաղթ…
Ամենակարեւորը վերջին ժամանակներս Հերմինե Նաղդալյանից սկսած բոլոր իշխանավորերը սկսեցին խոսել հողերի հանձնման մասին, ասես իրենց պապենական կալվածքն է: Սա Հայաստանի հողն է, 9 մլն հայության հողն է, որեւէ մեկը իրավունք չունի հող հանձնել՝ ազգը չի ների, ով ուզում է լինի: Կարգին տղերք են, թող մտածեն՝ ոնց գնանք հասնեն մինչեւ Քուռ, թշնամու ճակատը ջարդեն, ոչ թե վախվորած հետ քաշվեն: Օրական հող տալով՝ ո՞ւր ենք հասնելու: Այդ մեկը ոչ մեկ չի ների, կարող է՝ սոված մնանք, զրկանքներ կրենք, բայց հող հանձնելը ազգը չի ների»,- ասաց նա:
Ինչ վերաբերում է կոնկրետ այս դեպքին՝ Վարուժան Ավետիսյանի եւ մյուսների կողմից ՊՊԾ գունդը գրավելուն, գուսան Հայկազունը հույս ունի, որ ամեն ինչ փոխզիջմամբ կավարտվի ու ոչ մի կաթիլ արյուն չի թափվի:
Կարդացեք նաև
Գոհար ՀԱԿՈԲՅԱՆ
