Հեռակա համակարգում ընդունելությունը ՀՀ բուհերում սկսվում է օգոստոսի 25-ից. մեկնարկում է դիմումների ընդունելությունը:
«Հայելի» ակումբում լրագրողների հետ հանդիպմանը ՀՀ ԿԳՆ բուհերի համակարգման բաժնի պետ Սասուն Մելիքյանը տեղեկացրեց, որ դիմումների ընդունման վերջնաժամկետը սեպտեմբերի 25-ն է: Նա փաստեց, որ վերջին տարիներին հեռակա ընդունելությունը լուրջ մասսայականություն է սկսել վայելել այն առումով, որ ուսանողներն աշխատանքն ուսման հետ են զուգակցում` կապված նաև սոցիալական խնդիրների հետ:
Հեռակա համակարգում ընդունելությունը սկսվում է սեպտեմբերի 27-ից և տևելու է մեկ ամիս:
Բանակից զորացրվածների` անվճար հիմունքներով մագիստրատուրա ընդունելության դիմումների ընդունման վերջնաժամկետը օգոստոսի 26-ն է. մրցույթը կամփոփվի օգոստոսի 29-ին: Պարոն Մելիքյանը տեղեկացրեց. «Ունենք 100-ից ավելի անվճար տեղեր բանակից զորացրվածների`ուսումը մագիստրատուրայում շարունակելու համար»:
Մագիստրատուրայի վճարովի համակարգում ընդունելության դիմումների ընդունման վերջնաժամկետը սեպտեմբերի 1-ն է:
Պարոն Մելիքյանը տեղեկացրեց, որ «Կրթության մասին» ՀՀ օրենքում փոփոխություններ են նախատեսվում, որոնք ուղղված են կրթության որակի բարելավմանն ու զեղչային նոր համակարգի ներդրմանը: Նաև տեղեկացրեց, որ մարտական հերթափոխում ծառայածների եւ ապրիլյան պատերազմի մասնակիցների համար կկիրառվեն առավելագույն զեղչեր:
Տաթև ՀԱՐՈՒԹՅՈՒՆՅԱՆ
