Վերաքննիչ դատարանն այսօր մերժեց «Սասնա ծռեր» խմբի անդամ Վարդան Գերավետյանի կալանքի վերաբերյալ փաստաբան Դավիթ Գյուրջյանի բողոքը:
Փաստաբանի խոսքով,իր պաշտպանյալ Գերավետյանի առողջական վիճակը նորմալ է, չնայած ունի Ֆոսֆորային նռնակների հետեւանքով այրվածքներ:
«Մենք միջնորդել էինք, որ նրա մասնակցությունն ապահովվի դատարանում, նա առանձնապես հայտարարություններ չարեց, միանում էր մեր դիրքորոշումներին, բայց վերաքննիչ բողոքները մեզ համար անսպասելիորեն մերժվեցին»,- դատական նիստից հետո ասաց փաստաբանը:
Ըստ նրա, քննիչը պատասխաններ չէր գտնում, իրենց հետեւյալ հարցերին՝ մասնավորեցնել, թե որ ապացույցներով առաջին ատյանի դատարանն ու վերաքննիչ դատարանը պնդում են՝ հիմնավոր կասկածներ կան, որ Գերավետյանն առնչվում է իրեն մեղսագրվող երկու արարքներին. «Մենք պահանջում էինք բերել հիմնավորումներ, որոնք հիմք են այդ պնդմանը, թե կա կասկած նրա ապօրինի վարքագծի վերաբերյալ, որի դեպքում կալանքը՝ որպես խափանման միջոց, անհրաժեշտություն է եւ որն է հիմնավորումը, որի համաձայն գրավի կիրառումն անթույլատրելի է»:
Կարդացեք նաև
Պարոն Գյուրջյանի խոսքով, իրենք դատարանից պահանջում էին նաեւ կալանքի այլընտրանքը՝ կիրառել գրավ, ընդորում. «Առաջարկել էինք գրավի չափը սահմանել դատարանին, բայց դատարանը մերժեց»:
Արփինե ՍԻՄՈՆՅԱՆ
