Կենտրոն և Նորք-Մարաշ վարչական շրջանների ընդհանուր իրավասության դատարանում, մեղադրող դատախազ Արմեն Փանոսյանը քիչ առաջ հրապարակեց նախորդ տարվա նոյեմբերի 25-ին Նորք-Մարաշում վնասազերծված հանցավոր խմբի գործից «անջատված մասով» հարուցված քրգործով մեղադրական ճառը:
Դատաքննությունը, հիշեցնենք, ընթանում է արագացված կարգով, քանի որ չորս ամբաստանյալներն էլ իրենց մեղավոր են ճանաչել: Այս գործով մեղադրյալներ են Հակոբ Հակոբյանը, Անուշավան Ավետիսյանը, Ստեփան Չիլինգարյանը եւ Հարություն Հովհաննիսյանը:
Մեղադրական եզրակացության համաձայն, 2015 թվականի հուլիսին, Հակոբ Հակոբյանը Արթուր Վարդանյանից առաջարկություն է ստացել` համապատասխան վարձատրության դիմաց զենք, ռազմամթերք և պայթուցիկ նյութեր հայթայթել և իրեն վաճառել: Վերջինս, չիմանալով, որ դրանք նախատեսում են, ըստ անհրաժեշտության, գործածել` Հայաստանում իշխանության զավթելը իրականացնելու ժամանակ, նույն հարցով դիմել է ծանոթին` Գյումրի քաղաքի բնակիչ Անուշավան Ավետիսյանին: Այնուհետ արդեն երկուսով են ձեռնամուխ են եղել այդ գործին:
Հարություն Հովհաննիսյանն էլ, նույն առաջարկությունը ստանալով Անուշավան Ավետիսյանից, 2015 թվականի հուլիսին Գյումրիում նրան 900 ԱՄՆ դոլարով զենք-զինամթերք է վաճառել: Ստեփան Չիլինգարյանն էլ, իր հերթին, Անուշավան Ավետիսյանից 2015թ. հուլիսին առաջարկություն ստանալով` համապատասխան վարձատրության դիմաց զենք, զինամթերք և պայթուցիկ նյութեր է հայթայթել և վաճառել`չիմանալով, որ դրանք նախատեսվում են, ըստ անհրաժեշտության, գործածել Հայաստանում իշխանության զավթելը իրականացնելու ժամանակ: Չիլինգարյանը Գյումրիում 4700 ԱՄՆ դոլարով իր կողմից ձեռք բերված զենք-զինամթերք է վաճառել: Հիշյալ անձանց մեղադրանք է առաջադրվել` ՀՀ ՔՕ 235-րդ հոդվածի (ապօրինի զենք-զինամթերք պահել, իրացնելը) հատկանիշներով: Ներկայումս գործով 4 մեղադրյալներն էլ գտնվում են կալանքի տակ:
Կարդացեք նաև
Մեղադրող դատախազն իր ճառում նշեց, որ ամբաստանյալների կողմից հանցագործության բացահայտմանն աջակցելը դիտվել է որպես հանցանքը մեղմացնող հանգամանք: Նա միջնորդեց մեղավոր ճանաչել 4 ամբաստանյալներին եւ նրանց դատապարտել ազատազրկման` համապատասխանաբար՝ Հակոբ Հակոբյանին՝ 4 տարի, Անուշավան Ավետիսյանին՝ 3 տարի վեց ամիս, Ստեփան Չիլինգարյանին՝ 2 տարի, իսկ Հարություն Հովհաննիսյանին՝ 1 տարի 10 ամիս ժամկետով`խափանման միջոցը թողնելով անփոփոխ:
Այսօրվա դատական նիստում պաշտպանական ճառով հանդես եկան ամբաստանյալներ Հարություն Հովհաննիսյանի եւ Ստեփան Չիլինգարյանի պաշտպանները: Հարություն Հովհաննիսյանի պաշտպանը խնդրեց դատարանին` իր պաշտպանյալի պատիժը սահմանել ութ ամիս եւ նրան դատարանի դահլիճից ազատ արձակել կամ էլ`պատժի ժամկետը ութ ամսից ավել սահմանելու դեպքում, այն պայմանականորեն չկիրառել: Հովհաննիսյանն, ի դեպ, արդեն ութ ամիս է կալանավորված է:
Ստեփան Չիլինգարյանի պաշտպան Մարտին Զիլֆուղարյանն էլ պաշտպանական ճառում ասաց` իր պաշտպանյալը խնամքի տակ ունի հիվանդ մայր: Պաշտպանը նաեւ նշեց, որ Ստեփան Չիլինգարյանի հայրն էլ մահացել է այս գործի նախաքննության ընթացքում: «Իմ պաշտպանյալը վաճառել է իր պապից մնացած զենքը` սոցիալական ծանր պայմաններից ելնելով: Նա մեղայականով ներկայացել է, անկեղծորեն զղջացել եւ հայտնել իր կողմից կատարված արարքի մասին: Խնդրում եմ դատարանին` այս հանգամանքները հաշվի առնել»,- հավելեց պաշտպանը:
Մյուս ամբաստանյալների պաշտպաններն իրենց ճառերը կներկայացնեն հաջորդ դատական նիստին`սեպտեմբերի 7-ին, ժամը`14.00-ին:
Նելլի ԳՐԻԳՈՐՅԱՆ
