Սեպտեմբերի 8-ին, Մոսկվայում կայանալիք ԼՂ հարցով ԵԱՀԿ Մինսկի խմբի համանախագահների խորհրդակցություններից հայաստանյան կողմը առանձնակի ակնկալիքներ չունի: Այդ մասին, այսօր խորհրդարանում, լրագրողների հետ զրույցում ասաց ՀՀ փոխարտգործնախարար Շավարշ Քոչարյանը: Ըստ նրա, ակնկալիք կարող է լինել այն դեպքում, երբ Ադրբեջանը փոխի իր ապակառուցողական մոտեցումը:
«20 տարուց ավելի է, մենք այս գործընթացի մեջ ենք, պարբերաբար լինում են հանդիպումներ: Խնդիրը կայանում է նրանում, որ մենք չենք արձանագրում առաջընթաց մի շատ պարզ պատճառով` կողմերից մեկը` Ադրբեջանը, նույնիսկ այն պայմանավորվածությունները, որ լինում են բանակցային սեղանի շուրջ, դրանք կոպտորեն խախտում է: Դրա վառ վկայությունն այս վերջին Վիեննայի և Սանկտ Պետերբուրգի հանդիպումներն են, որտեղ խոսվել է և պարտավորություն է վերցվել, որպեսզի շփման գծում ամրապնդվի կրակի դադարեցման ռեժիմը: Սակայն իրական դաշտում Ադրբեջանը խանգարում է»,- մասնավորեցրեց Շավարշ Քոչարյանը`հավելելով. «Ի՞նչ է նշանակում բանակցություն չկա: Բանակցություն` ինչի՞ շուրջ: Հիմա բանակցում ենք, որ Վիեննայի եւ Սանկտ Պետերբուրգի պայմանավորվածությունները կյանքի կոչվեն: Քանի սադրում են, անհնար է արդեն կարգավորման շուրջ բանակցություններում ձեռք բերվի առաջընթաց»:
Նելլի ԳՐԻԳՈՐՅԱՆ
