ԱԺ-ում իր ծրագիրն է ներկայացնում գլխավոր դատախազի թեկնածու Արթուր Դավթյանը:
ՀՀԿ պատգամավոր Մարգարիտ Եսայանը նրան հարցրեց, թե ի՞նչ կարծիք ունի ՔրՕր-ում պատիժների մասին, որոնց հետ կապված ինքը խնդիր է տեսնում: Պատգամավորը նաեւ ասաց, որ մեզանում վատ ավանդույթ է դարձել կալանքը որպես խափանման միջոց ընտրելը, արդյոք հաճա՞խ չեն ընտրում կալանքը: Արթուր Դավթյանը պատասխանեց, որ կալանքի յուրաքանչյուր ընտրություն պետք է ունենա հստակ հիմնավորումներ. «Ոչ մի վարույթ իրականացնող մարմնի համար ցանկալի չէ մեղադրյալին կալանքի տակ պահել: Քաղաքական առումով համադրություն անել ու ասել կալանքները շատ են կամ քիչ են՝ ճիշտ չէ: Եվրոպական դատարանը վերջերս փոխել է իր դիրքորոշումը եւ կոնկրետ դեպքերում պետք է միջնորդություն ներկայացնելիս բավարար հիմքեր լինեն, որ կալանքի տակ չմնալով՝ մեղադրյալը նոր հանցագործություն կկատարի, կխուսափի պատասխանատվությունից կամ կխոչընդոտի նախաքննության ընթացքին»:
ՀԱԿ խմբակցության քարտուղար Արամ Մանուկյանը հիշեցրեց Գեւորգ Կոստանյանի տված տղամարդու խոստումը, հիշեցրեց Մարտի 1- գործը. «Մենք խորհրդարան ենք մտել՝ Մարտի 1-ի գործը բացահայտելու եւ հանցագործներին ու կազմակերպիչներին պատժելու ծրագրով: Ձեր նախորդի նախորդը համարձակություն ունեցավ բացահայտ հայտարարել, որ գործը փակված է, նույնիսկ ծնողներին մեղադրեց՝ գործը ձգձգելու համար: Եկավ ձեր նախորդը, խոստումներ տվեց բոլորի ներկայությամբ՝ տղամարդու խոստում, խոստացավ, որ սայլը տեղից շատ արագ կշարժվի: Գնաց ինքը՝ իր խոստումների հետ՝ ոչինչ չանելով: Հիմա եկել եք դուք, ի՞նչ եք մտածում կազմակերպել այս ուղղությամբ»:
Արթուր Դավթյանը պատասխանեց. «Չբացահայտվող հանցագործություններ չպետք է լինեն, այլ հարց է, թե մեր օբյեկտիվ եւ սուբյեկտիվ հնարավորությունները որքան են թույլ տալու՝ յուրաքանչյուր դեպքում ունենալ կոնկրետ ճշմարտության բացահայտում»:
Կարդացեք նաև
Արթուր Դավթյանը խոստացավ, որ Մարտի 1-ի գործն ուսումնասիրելն ու բացահայտելն իր առաջնահերթություններից մեկն է լինելու. «Շատ լավ եմ պատկերացնում այս քրեական գործի ընթացքի հետ կապված բարձր հետաքրքրությունը մեր հասարակության մոտ»:
Հռիփսիմե ՋԵԲԵՋՅԱՆ
