Ինչպես հայտնի է՝ ԲՀԿ ցուցակը գլխավորող Վարդեւան Գրիգորյանի կրտսեր որդու՝ 25-ամյա Արշակ Գրիգորյանի մահվան դեպքի կապակցությամբ հարուցվել է քրեական գործ՝ ՀՀ Քրեական օրենսգրքի 110 և 235 հոդվածների առաջին մասի հատկանիշներով:
Այն է՝ ինքնասպանության հասցնելը և ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Հիշեցնենք, որ, ըստ ոստիկանության տեղեկատվության, երիտասարդին հրազենային վնասվածքով գտել են իրենց տան նկուղում։ Հորաքրոջ որդին ու եղբայրը իրենց մեքենայով նրան Գյումրիի բժշկական կենտրոն էին տեղափոխել, սակայն կյանքը փրկել չէր հաջողվել։
Մենք դեպքի վայրի զննություն կատարող իրավապահներից հետաքրքրվեցինք, թե հայտնաբերվե՞լ է Արշակ Գրիգորյանի թողած որևէ գրություն, որով կհիմնավորվեր ինքնասպանություն գործելու դրդապատճառները։ «Ոչ, նման գրություն չի հայտնաբերվել»,-փոխանցեցին մեզ։
Կարդացեք նաև
Նշենք, որ գյումրեցիները թերահավատորեն են վերաբերվում ինքնասպանություն գործելու վարկածին, երիտասարդին բնութագրում են որպես լուրջ, հավասարակշռված, դաստիրակված ու չափից ավելի համեստ անձնավորության, որը դժվար թե նման քայլի գնար։ Շատերը ենթադրում են, որ սա կապված է Գյումրիում սպասվող ՏԻՄ ընտրությունների հետ։
Նշանակված են մի շարք փորձաքննություններ՝ դատաձգաբանական, դատամատնադրոշմային, դատագենետիկական, դատակենսաբանական։
Նունե ԱՐԵՎՇԱՏՅԱՆ
