Նոյեմբերի 3-ին Ժան Պոլ էքզիստենցիալ սրճարանում տեղի ունեցավ grqaser.org կայքի շնորհանդեսը:
Այն հիմնադրվել է դեռևս 2015 թվականին՝ «Գրքասեր» հասարակական կազմակերպության նախաձեռնությամբ: «Կայքը երբևէ չի գովազդվել: Սա առաջին անգամն է, որ ներկայացնում ենք զանգվածային լրատվամիջոցներին, որը հնարավորություն կտա ավելի մեծ թվով մարդկանց տեղեկանալ կայքի գոյության մասին»,-ասաց «Գրքասեր» հ/կ-ի անդամ Գոռ Հարությունյանը:
Կայքի աշխարհագրությունը բավականին ընդարձակ է: Այն ընդգրկում է այն բոլոր երկրները, որտեղ հայկական համայնքներ կան՝ սկսելով ԱՄՆ-ից, Ռուսաստանի Դաշնությունից և տարօրինակ կերպով հասնելով մինչև Թունիս: «Մենք ընտրում ենք մինչև 1991 թվականը տպագրված գրքեր, որպեսզի չվնասենք հրատարակչական գործին: Իհարկե, դեռ կան մարդիկ, ովքեր համոզված են, որ տպագիր գիրքն ուրիշ է՝ իր հոտով, թերթերով, այնուամենայնիվ grqaser.org-ի գործառույթներն այլ են և «չեն խանգարում» տպագիր գիրք կարդացողներին»,-հավելեց Գոռը:
Կարդացեք նաև
Կայքը հնարավորություն է տալիս գրքեր լսելու այն մարդկանց, ովքեր չունեն ժամանակ կարդալու կամ տեսողական խնդիրներ ունեն, ինչպես նաև նրանց, ովքեր խոսում և հասկանում են հայերեն, բայց կարդալ չեն կարողանում: Գրքերն ընթերցում են ինչպես հայտնիները, այնպես էլ սովորական ընթերցողներ, որոնք համապատասխան ձայնային տվյալներ ունեն:
Հատկանշական է, որ գրքերը ձայնագրվում են ինչպես արևելահայերեն, այդպես էլ արևմտահայերեն: Հաղորդավարուհի Սևան Քէլէշեանը ինքն է գտել կայքը և ընդգրկվել այս ծրագրում. «Երբ Հայաստան եկա, միջոցներ էի փնտրում, որ արևմտահայերենը տարածեմ Հայաստանին մեջ: Իմացա կայքի մասին, ու ինձ շատ հարազատ էր և’ գրքի գաղափարը, և, հատկապես, արևմտահայերեն գրքի: Շատ ուրախ եմ, որ իրենք էլ գիտակցեցին արևմտահայերենի կարևորությունը: Սկսեցինք Հակոբ Պարոնյանի պատմվածքներից, նկատի ունենալով, որ համեմատաբար ավելի հեշտ է»:
Երեխաները նույնպես ընդգրկվել են այս ծրագրում: Նրանք թարգմանում են մուլտֆիլմեր, ձայնագրում, երբեմն նույնիսկ մասնակցում են մոնտաժման աշխատանքներին: Կայքի յութուբյան ալիքում հնարավոր է տեսնել նրանց աշխատանքները, որոնցից մեկը ցուցադրվեց հենց շնորհանդեսի ընթացքում:
Մարիամ ԽԱՉԱՏՐՅԱՆ
Լուսանկարները՝ Հասմիկ Սիրունյանի
