ՀՀ վարչական դատարանում այսօր քննվեց այս տարվա մարտի 23-ին «Նոր Հայաստան» շարժման անդամ Գևորգ Սաֆարյանի եւ այլ կալանավորված քաղաքացիական ակտիվիստների սատարման ցույցի մասնակից, «Հիմնադիր խորհրդարանի» անդամ Վարդան Բալյանի դեմ ՀՀ ոստիկանության հայցը, որով վերջինս պահանջում է Վարդան Բալյանին վարչական պատասխանատվության ենթարկել ՀՀ վարչական իրավախախտումների վերաբերյալ օրենսգրքի մի շարք պահանջներով:
Մասնավորապես, ըստ ոստիկանության, հավաքի ժամանակ Վարդան Բալյանը չի ենթարկվել ոստիկանի՝ հակահասարակական գործունեությունը դադարեցնելու եւ ճանապարհի երթեւեկելի հատվածն ազատելու օրինական պահանջներին:
Հիշեցնենք, որ նշյալ հավաքի ժամանակ որոշ ակտիվիստներ պառկել էին Մաշտոցի պողոտայի երթեւեկելի հատվածում եւ շղթաներով իրենց ամրացրել ասֆալտին:
Aravot.am-ի հետ զրույցում Վարդան Բալյանն ասաց, որ ինքը շղթայվածների թվում չի եղել. «Ոստիկանները որոշակի բռնի ձեւերով ազատեցին փողոցը: Ավելի շատ տուժեց Կարո Եղնուկյանի կինը: Ինձ էլ բռնի կերպով, քաշքշելով տարան ոստիկանություն, ինչպես հավաքի մասնակիցներից շատերին: Ակցիա կատարելը մեր իրավունքն է, իսկ ոստիկանի բռնի գործողությունն անօրինական է: Ես մասնակցել եմ, եթե դա բռնի գործողություններ կատարելու հիմք է տալիս ոստիկաններին, ի՞նչ ասեմ…»:
Կարդացեք նաև
Դատավորին ներկայացվեց գործին կցված տեսանյութ, որում երեւում է նաեւ Վարդան Բալյանը՝ «շղթայակապ» ցուցարարների հետեւում պաստառով կանգնած: Բալյանի պաշտպան Տաթեւիկ Սիրադեղյանը պնդեց, որ նա հավաքի ժամանակ հակաօրինական վարքագիծ չի դրսեւորել:
Այս գործով Վարչական դատարանը որոշումը կհրապարակի նոյեմբերի 28-ին՝ ժամը 15:30-ին:
Լուիզա ՍՈՒՔԻԱՍՅԱՆ
«բռնի կերպով, քաշքշելով տարան»
………………………………………………………..
օրինական դասընթացք 101 :
աշխարհի որեւէ մէկ երկրի մէջ, երբ որ ոստիկանը քեզ ձերբակալում է, եթէ դիմադրես, իրաւունքը ունի քեզ քաշքշելով տանելու
որքան աւելի դիմադրես, իրաւունքը – պատրականութի՛ւնը – ունի այնքան աւելի շատ ուժ կիռարելու
իսկ այս դիպվածների պարագային, բացահայտ է թէ շատ անգամ ցուցարարները իրենք, դիտումնաւոր կերպով, ուզում են որ ոստիկանները ստիպվին դիմել ուժի, որպէսզի աւելի «զգայացունց» դառնա ցոյցը… մանաւանդ երբ որ չորս-հինգ ցուցարարներ են միայն, եւ ուզում են որ աղմուկ լինի իրենց մասին