2016 թվականին լրանում է անվանի կոմպոզիտոր Առնո Բաբաջանյանի մահվան 33-րդ տարելիցը: Առնո Բաբաջանյանի հիշատակի հիմնադրամի նախաձեռնությամբ, որպես հարգանքի տուրք՝ նոյեմբերի 11-ին կազմակերպվել էր ծաղկեդրման արարողություն՝ կոմպոզիտորի արձանի մոտ և այցելություն նրա շիրիմին:
Հայաստանի պետական ֆիլհարմոնիայի «Առնո Բաբաջանյան» համերգասրահի մուտքի և Առնո Բաբաջանյանի արձանի մոտ ողջ օրվա ընթացքում հնչեցին կոմպոզիտորի ստեղծագործությունները: Կոմպոզիտորի շիրիմին Տեր Շահե քահանա Հայրապետյանի օրհնությամբ կատարվեց հոգեհանգստյան կարգ:
Առնո Բաբաջանյանի արձանի մոտ ծաղկեդրման արարողությանը մասնակցում էր նաև ՀՀ Մշակույթի նախարար Արմեն Ամիրյանը. «Ընդհանրապես, կան մարդիկ, որոնց նույնիսկ հիշատակի օրը տոն է դառնում ժողովրդի համար: Առնո Բաբաջանյանն իր երաժշտության գույներով, հնչյուններով, կարողանում է իսկապես մեր կյանքը տոն դարձնել»,- իր խոսքում ասաց նախարարը:
Կարդացեք նաև
Հայաստանի պետական ֆիլհարմոնիայի տնօրեն, «Առնո Բաբաջանյանի հիշատակի հիմնադրամ»-ի հայաստանյան մասնաճյուղի նախագահ, մշակույթի վաստակավոր գործիչ Գագիկ Մանասյանը կարևորում է նման միջոցառումների կազմակերպումը. «Սերունդների կրթման և զարգացման գործում կարևոր է մեր մեծերի կերպարը վառ պահելը, անհրաժեշտ է հանրահռչակել նրա երաժշտական ժառանգությունը:
Առնո Բաբաջանյանն իր ստեղծագործություններով բացառիկ կոմպոզիտոր է: Նա այն բարձունքն է, որը որպես օրինակ պետք է ծառայի սերունդների համար»,- ասաց Գագիկ Մանասյանը:
Միջոցառմանը ներկա էին Առնո Բաբաջանյանի անվան պետական երաժշտամանկավարժական քոլեջի սաները, Կոմպոզիտորների միության նախագահ Արամ Սաթյանը, երգչուհի Ռաիսա Մկրտչյանը և այլ անվանի արվեստագետներ, մտավորականներ, պետական ու հասարակական գործիչներ, կոմպոզիտորի արվեստի երկրպագուներ:
Հայաստանի պետական ֆիլհարմոնիա