Այսօր ԱԺ ճեպազրույցների ժամանակ ՕԵԿ պատգամավոր Հովհաննես Մարգարյանը տեղեկացրեց, որ երեկ 32 պատգամավորների ստորագրությամբ Գյումրիի ընտրությունների հետ կապված դիմել են Սահմանադրական դատարան. «Պահանջն այն է, որ քննարկեն ԸՕ 141 հոդվածի 5-րդ մասով ամրագրված այն բոնուսային կամ ֆոկուսային համակարգը, որի արդյունքում ստացվում է, որ ժողովրդի կողմից 34 տոկոս քվե ստացած փոքրամասնությունը այդ հաշվարկի արդյունքում դառնում է մեծամասնություն եւ նշանակում է քաղաքապետ»:
Հովհաննես Մարգարյանն ասաց, որ եթե այս հարցին լուծում չտան, հնարավոր է Երեւանում էլ, մյուս քաղաքներում էլ բացառված չի, որ 3 քաղաքական ուժերից, որոնցից երկուսը կհաղթահարեն 6 տոկոսի շեմը եւ կստանան 6.5-7 տոկոս ձայներ, իսկ մեկը կստանա 10-11 տոկոս ձայն, դա կդառնա 51 տոկոս, այսինքն՝ մեծամասնություն: Քաղաքական միավորը, իրավունք կստանա ձեւավորել իշխանություն եւ նշանակի քաղաքապետ՝ ոտնահարելով Սահմանադրությունը: Ոչ թե սա խայտառակություն կդիտվի, այլ սա խիստ մտահոգիչ է, վտանգավոր եւ կործանարար»:
Հովհաննես Մարգարյանն ասաց, որ գործի քննությունը հրապարակային է լինելու, դիմել են, որ բանավոր ընթացակարգով այն լինի:
Հռիփսիմե ՋԵԲԵՋՅԱՆ
