ԱԺ պատգամավոր Գուրգեն Արսենյանի որդու՝ կրտսեր Գուրգեն Արսենյանի և նրա ընկերների գործի քննությունը հնարավոր է արագացված կարգով ընթանա: Ամբաստանյալները խոստովանել են իրենց մեղքը, այսօրվա դատական նիստում էլ արագացված կարգով քննություն անցկացնելու վերաբերյալ միջնորդություն ներկայացրին:
Կենտրոն եւ Նորք -Մարաշ վարչական շրջանների ընդհանուր իրավասության դատարանն էլ հետաձգեց նիստը, որ մեղադրող դատախազը հնարավորություն ունենա ներկայացնել իր դիրքորոշումը այդ միջնորդության վերաբերյալ:
Հիշեցնենք, որ Գուրգեն Արսենյանին մեղադրանք է առաջադրվել, որ նա իր ընկերներ Արմեն Ներսիսյանի, Գուրգեն Գրիգորյանի և գործով ինքնությունը չպարզված այլ անձանց հետ միասին 2016թ. ապրիլի 17-ին Երևան քաղաքի Աբովյան փող. թիվ 39 հասցեում գործող «Կրիստալ» գիշերային ակումբի դիմաց կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ՝ խմբի կազմում, որպես զենք օգտագործվող առարկայի գործադրմամբ, կատարել է խուլիգանություն:
Գուրգեն Արսենյանի պաշտպան` փաստաբան Արտակ Քոչարյանը շարունակում է պնդել, որ իր պաշտպանյալի արարքում չկա խուլիգանություն, իր տեսանկյունից դա «տղայական ծեծկռտուք էր»:
Կարդացեք նաև
Մեր հարցին, թե հաշտվե՞լ են ծեծկռտուքի մասնակիցները, նա պատասխանեց, որ չէին էլ կռվել. «Ամեն դեպքում հիմա հաշտ են, նրանք ընկերներ են»: Դատական հաջորդ նիստը նշանակվեց հունվարի 13-ին:
Արփինե ՍԻՄՈՆՅԱՆ
