Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանն այսօր որոշեց եւս 2 ամսով երկարաձգել «Սասնա ծռեր» խմբի անդամ, ազատամարտիկ Պավել Մանուկյանի խափանման միջոց կալանքը։
Նրա պաշտպան՝ փաստաբան Հարություն Բաղդասարյանը (լուսանկարում) Aravot.am-ին ասաց, որ Պավել Մանուկյանը նիստերին չի մասնակցում, որովհետեւ դատարանից ակնկալիք չունի. «Որեւէ բանի չի հավատում: Սպասում է քաղաքական պայքարի գործընթացի վերսկսմանը»:
Նա նաեւ ասաց, որ դատարանի որոշումը բողոքարկելու են վերաքննիչ դատարանում։
Պարոն Բաղդասարյանից հետաքրքրվեցինք՝ արդյոք Պավել Մանուկյանը քաղաքական իրադարձությունների, մասնավորապես ձեւավորվող դաշինքների մասին իր հետ զրուցել է ու ինչ կարծիք է հայտնել, ի պատասխան պարոն Բաղդասարյանն ասաց. «Ամեն ինչ բերելու է զրոյի՝ ցանկացած քաղաքական պայքար, որը սկսվում է Բաղրամյան 26-ից վերջանում է Բաղրամյան 26-ում: Քաղաքական պայքար այսօր Հայաստանում չկա, Հայաստանում կա իշխանության համար կռիվ ու բոլոր դասավորվածություններն իրականացվում են Բաղրամյան 26-ում, այնտեղից ձեւական ցույց տալիս, այնտեղ էլ վերջանում է»:
Կարդացեք նաև
Նա նաեւ ասաց, որ Պավել Մանուկյանի առողջական վիճակը բարվոք է, նա հենակներով կարողանում է տեղաշարժվել։
Արփինե ՍԻՄՈՆՅԱՆ
