Այսօր «Փաստարկ» ակումբում լրագրողների հարցին՝ ԿԸՀ-ն հայտարարել է, որ Գագիկ Ծառուկյանը խախտել է օրենքը, դրամական եւ նյութական խոստումներով է սկսել քարոզարշավը, ինչպե՞ս կմեկնաբանեք դա՝ «Ծառուկյան» դաշինքի անդամ Վարդան Բոստանջյանը պատասխանեց. «Ես բոլոր դեպքերում հակված չեմ մեկնաբանել այդ բանը: ԿԸՀ-ն թող գնա այլ խնդիրների, որոնք, այսպես կոչված, օրենքի խախտումներ են, դրա մասին խոսի, ոչ թե Գագիկ Ծառուկյանի խոստումների մասին: Այդ խոստումները, ըստ էության, ոչ թե հիմա են տեղի ունեցել, դա միշտ գոյություն ունի»:
Նա ասաց, որ քաղաքացիները սպասում են, թե ինչպիսին է լինելու իրենց գործունեության հեռանկարը, որով զբաղված են՝ կարողանալո՞ւ են այդ գործունեության համար որոշակի երաշխիքներ ունենալ. «Գագիկ Ծառուկյանը պարզապես իր հզորությամբ ու մեծությամբ այդ երաշխիքներն է ասում, վա՞տ բան է անում: Եթե որեւէ մեկը դա վատ քայլ է որակում, ես չեմ կարող այլ մեկնաբանություն տալ»:
Մենք հետաքրքրվեցինք, թե տնտեսագիտորեն ինչքանով է հիմնավորված «ՕՐՕ» դաշինքի ծրագիրը, ըստ որի՝ սուպերմարկետները ժամը 21.00-ից հետո պետք է փակել, որ այդ ընթացքում փոքր կրպակները կարողանան աշխատել: Բոստանջյանը պատասխանեց. «Հիմնավորված է: Զարգացած աշխարհներում սուպերմարկետները աշխատում են մինչեւ ժամը 6-ը: Սա շատ հետաքրքիր մոտեցում է, որովհետեւ փոքրների համար պետք է տեղ թողնեն: Սա ամբողջ աշխարհում ընդունված կարգ է: Խոշոր տնտեսվարողների առկայության հետ միասին պետք է ստեղծել պայմաններ ոչ մեծ շրջանառություն ունեցողների համար»:
Ինչպես հայտնի է, Վարդան Բոստանջյանը 5-րդ գումարման ԱԺ-ում չկար: Թե ինչո՞վ է պայմանավորված իր որոշումը նորից ակտիվ քաղաքականություն վերադառնալու՝ նա պատասխանեց. «Բոլոր դեպքերում հիմա այն քաղաքական ուժի մեջ եմ, որտեղ ես գտնվել եմ, պարզապես 2012-ին հարմար չգտնվեց, որ ես գտնվեմ ակտիվ քաղաքական դաշտում: Ես ոչ խորացել եմ, ոչ էլ հետաքրքրվել եմ, ոչ էլ փնտրել եմ պատճառները: Իսկ հիմա գտել են հարմար»:
Կարդացեք նաև
Հռիփսիմե ՋԵԲԵՋՅԱՆ
