«Կոնգրես-ՀԺԿ» դաշինքի՝ «Հաղթանակը խաղաղությունն է» քարոզչական հոլովակում նկարահանվել է Հայաստանի պետական տնտեսագիտական համալսարանի 2-րդ կուրսի ուսանող Զաքար Ղազարյանը: Նա 2016-ին է զորացրվել է բանակից:
Aravot.am-ը Զաքարից հետաքրքրվեց՝ պարզապես նկարահանվե՞լ է տեսահոլովակում, թե՞ նաև կիսում է «Կոնգրես-ՀԺԿ» դաշինքի գաղափարախոսությունը, Զաքարը պատասխանեց, թե «միանշանակ կիսում և անվերապահորեն վստահում է դաշինքին»:
Այնուհետև պատմեց, թե ինչպես եղավ, որ հայտնվեց դաշինքի քարոզչական հոլովակում. «Ընկերներ ունեմ Կոնգրեսում, իրենք առաջարկեցին, ու ես համաձայնեցի»:
Հարցին՝ ինչպե՞ս է ընկալում խաղաղության գաղափարախոսությունը, Զաքարը պատասխանեց. «Խաղաղություն, բայց ոչ ամեն գնով: Այսինքն՝ արժանապատիվ խաղաղություն, երբ Ղարաբաղի հարցում, օրինակ, տարածքների հանձնումից հետո լինում են երաշխիքներ»:
Կարդացեք նաև
Հստակեցրինք՝ այսինքն 7 շրջանների հանձնմանը կո՞ղմ է, մեր զրուցակիցը պատասխանեց. «Նախ՝ խոսքը 5 շրջանների մասին է: Եվ եթե երաշխավորվում է խաղաղություն, ապա տարածքների հանձնմանը կողմ եմ: Երաշխավորված, արժանապատիվ և հաղթանակած խաղաղությանն եմ կողմ, որ մեր ունեցած տարածքներն ամրագրենք, որ ամեն օր զինվոր զոհվելու վտանգը չլինի: Տարածքները հանձնել արժանապատիվ, երաշխավորված ձևով, որ միջազգային հանրությունը երաշխավորի խաղաղություն, և ճանաչվի ԼՂՀ ժողովրդի անկախությունը»:
Մեր այն դիտարկմամը, թե տեսակետ կա, որ եթե տարածք հանձնենք, Ադրբեջանի ախորժակն ավելի է մեծանալու, Զաքարը պատասխանեց. «Եթե Հայաստանն իր դիրքորոշումն արտահայտում է խաղաղության հարցում և ստանում միջազգային հանրության համակրանքը, Ադրբեջանը մնում է մենակ ողջ աշխարհի դեմ և դժվար թե դուրս գա ամբողջ աշխարհի դեմ: Այդպիսով կպարտադրվի նրան խաղաղություն»:
Զաքար Ղազարյանն այժմ մասնակցում է «Կոնգրես-ՀԺԿ» դաշինքի քարոզարշավին: Հետաքրքրվեցինք՝ ո՞րն է պատճառը, որ լինելով երիտասարդ՝ հետաքրքրված է քաղաքականությամբ: Նա պատասխանեց, որ ամեն օր շփվելով անարդարությունների հետ՝ մեր երկրում անհնար է դառնում քաղաքականությամբ չզբաղվելը:
Տաթև ՀԱՐՈՒԹՅՈՒՆՅԱՆ
